جمالین گؤزومدن نیهان اولالی

جمالین گؤزومدن نیهان اولالی،
ایسترم باخماییم دۆنیایه، پری!
خیال ائیله‌دیکجه او سرو قدّین،
دؤنر قانلی یاشیم دریایه، پری!

اولسالار یۆز ملک، یۆز حوری غؽلمان،
یۆز مینا گردنلی، زۆلفو پریشان،
یۆز لاله یاناقلی، لبلری مرجان،
کؤنول دؤنمز سندن کیمسه‌یه، پری!

سن گئده‌لی، من زیاده آغلارام،
وئرمیشم عؤمرومو بادا، آغلارام،
هر دۆشنده قدّین یادا، آغلارام،
اۆنوم چؽخار عرش-اعلایه، پری!

سندن آیری باغریم کابابا دؤنموش،
یؽخیلمیش دیل شهری خرابا دؤنموش،
فیرقتین دامو تک عذابا دؤنموش،
دیدارین جنّت‌المأوایه، پری!

بیر گؤره‌یدیم سنین گۆل جمالینی،
جادو گؤزلرینی، یای هیلالینی،
مۆعنبر ساچینی، هیندو خالینی،
یئتردی هر دردیم دوایه، پری!

پئیوسته قورولسون قاشین کامانی،
اوخلارین سینه‌مدن کئچسین نیهانی،
گۆل بدنین هئچ گؤرمه‌سین یامانی،
لۆطف ائیله واقیف-شئیدایه، پری!