دولدو دیماغیما زۆلفون عنبری

دولدو دیماغیما زۆلفون عنبری،
واله اولدو کؤنول هوادن سنه.
الیم یئتمز، نامه یازیب دردیمی
گؤندریرم باد-صبادن سنه.

اوتوروشون گؤزل، دوروشون گؤزل،
ساللانیشین گؤزل، یئریشین گؤزل،
خویون، خۆلقون گؤزل، هر ایشین گؤزل،
بخش اولوب بو خوبلوق خودادن سنه.

دوداقلارین اوخشار لعل-یمنه،
یادا دۆشدو، باغریم قان اولدو یئنه،
سیاه تئل دۆزورسن بیاض گردنه،
دۆشوبدور بو قایدا سونادن سنه.

فیکر و خیالیندیر کؤنلوم زینتی،
شیرین سؤزلریندیر آغزیم لذّتی،
سنسن منیم عؤمروم، گۆنوم وحدتی،
یئتیشمه‌سین، یا رب، بلادن سنه.

غم ائوینده سالدین کۆنجه واقیفی،
ائیله‌دین موییندن اینجه واقیفی،
نئچون اینجیدیرسن مونجا واقیفی،
نه حاصیل بو جؤور و جفادن سنه؟