باد-صبا، بیر خبر وئر کؤنلومه
باد-صبا، بیر خبر وئر کؤنلومه،
گؤروم او یاناغی لاله گلیرمی؟
حسرتیندن کؤنول دؤنوبدور قانا،
باش چکمگه بیزیم حاله گلیرمی؟
ساللاناندا ائیلر ناز و غمزهلر،
اۆز دؤشر پایینه گؤرن کیمسهلر،
قاشا-گؤزه چکمیش سیاه سۆرمهلر،
سؽغال وئریب خطّی خاله، گلیرمی؟
الله مورادینی وئرسین او یارین،
رقیبی کوییندن سۆرسون او یارین،
مۆبارک گوشونا، گؤرسون او یارین،
من چکدیگیم آه و ناله گلیرمی؟
اوخ کیرپیگین اوجو آ یاشا دؤنموش،
گؤزلرین جلّادی تاماشا دؤنموش،
سگ رقیبین جانی نه داشا دؤنموش،
بیر زواله گؤر حواله گلیرمی؟
واقیفم، یاریدیم دوستا، دۆشمنه،
تا کی، جۆنون اولدوم یئتیشدیم سنه.
سنین تکی گؤزل سئون کیمسنه
دخی عقله، بیر کماله گلیرمی؟