سراسر بیر یئره یؽغیلسا خوبلار
سراسر بیر یئره یؽغیلسا خوبلار،
سنین بیر مویینه تای اولا بیلمز.
گۆنش تکی شؤعله وئرر جامالین،
بئله گؤزللیکده آی اولا بیلمز.
هئچ گؤزلی سن تک شوخ گؤرمهمیشم،
نه فایدا، حۆسنونو چوخ گؤرمهمیشم.
اوزون کیرپیگین تک اوخ گؤرمهمیشم،
قاشلارین طرزینده یای اولا بیلمز.
حسرتیندن باغریم قان ایلن دولوب،
هئیوا تکی رنگیم سارالیب-سولوب،
بو خوبلوق کی، حقدن بخش اولوب،
هئچ کیمسهیه بئله پای اولا بیلمز.
قدّین شاهباز، آغ بدنین سمن تک،
یاناغین لالهدن زیادا گؤیچک،
اوستاد سنی چکیب مانند-ملک،
بوندان آرتیق حق و سای اولا بیلمز.
واقیفم، من سنه حئیران اولموشام،
قاشلارین یایینا قوربان اولموشام،
دردیندن دیدهسی گیریان اولموشام،
قانلی یاشیم کیمی چای اولا بیلمز.