باد-صبا، بیر خبر وئر کؤنلومه

باد-صبا، بیر خبر وئر کؤنلومه،
اول گۆل-خندانیم نئچون گلمه‌دی؟
خیالیم شهرینی قویدو ویرانه،
سروریم، سولطانیم نئچون گلمه‌دی؟

سرخوش یئریشینه قوربان اولدوغوم،
گؤرمه‌ینده دلی-دئوران اولدوغوم.
مینا گردنینه حئیران اولدوغوم،
سرو-خورامانیم نئچون گلمه‌دی؟

قاشی کامان، کیرپیکلری قمه‌لیم،
آغزی شکّر، دوداقلاری یئمه‌لیم،
الوان کلاغایلی، بیاض ممه‌لیم،
سینه‌سی مئیدانیم نئچون گلمه‌دی؟

محراب و منبریم، کعبه‌ی-عۆلیام،
عقلیم، هوشوم، جانیم، هم دینیم، دۆنیام،
ائلیم، گۆنوم، اوبام، میصر و زۆلئیخام،
یوسیف-کنعانیم نئچون گلمه‌دی؟

نسرین بیناگوشلوم، بنفشه مویلوم،
پریلر طلعتلیم، ملایک خویلوم،
بۆللور لطافتلیم، صنوبر بویلوم،
حوری و قیلمانیم نئچون گلمه‌دی؟

آغزی خئییر سؤزلوم، دیلی دیلکلیم،
تر قوللوم، آغ اللیم، گۆموش بیلکلیم،
قاریچقای جیلوه‌لیم، طاووس بزکلیم،
لیباسی الوانیم نئچون گلمه‌دی؟

واقیف، ایله دؤندو بیر ساعتیمیز،
نه صبریمیز قالدی، نه طاقتیمیز.
بو گۆندن بئله‌دیر قیامتیمیز؛
گلمه‌دی جانانیم، نئچون گلمه‌دی؟