بویون صوراحیدیر، بدنین بۆللور

بویون صوراحیدیر، بدنین بۆللور،
گردنین چکیلمیش مینادان، پری!
سن ها بیر سوناسان، جۆدا دۆشوبسن
بیر بؤلوک یاشیلباش سونادان، پری!

ایختیلاطین شیرین، سؤزون مزه‌لی،
شکر گۆلوشوندن جانلار تزه‌لی،
ائللر یاراشیغی، اؤلکه گؤزلی،
نه گؤزل دوغوبسان آنادان، پری!

اۆز یانیندا تؤکولوبدور تئل نازیک،
سینه مئیدان، زۆلف پریشان، بئل نازیک،
آغیز نازیک، دوداق نازیک، دیل نازیک،
آغ اللرین الوان حنادان، پری!

آوچی‌سی اولموشام سن تک مارالین،
خیالیمدان چؽخماز هرگیز خیالین.
انلیگی، کیرشانی نئیلر جامالین،
سن ائله گؤزلسن بینادان، پری!

گۆنش تکی هر چؽخاندا سحردن
آلیرسان واقیفین عقلینی سردن.
دوعاچینام، سالما منی نظردن،
اکسیک اولمایاسان ثنادان، پری!