گل، ای غلبه‌یی محمّدخان بگ

گل، ای قلبه‌یی محمّدخان بگ،
اگر صیّاد ایسن، بره‌نی ساخلا!
ناغاراخانانین یوللارین گؤزله،
بوششالیدان گلن دره‌نی ساخلا!

ائولرده مست، باشماق ساتانی قویما،
چاخیر ایچیب سرخوش یاتانی قویما،
اؤزونه قارداشلیق توتانی قویما،
قوناق اۆچون چؤرک وئرنی ساخلا!

دوست دوستون یولوندا دۆشر زیانا،
ایگید گرک تاب گتیره دایانا،
ناغاراخانادان بیر آز بو یانا،
ظالیم، [سن] جهد ائیله اورانی ساخلا!

سن منیم سؤزومه هئچ گتیرمه شک،
بیزیم ائولرده ده گل گؤرون تک-تک،
دیرریک-تره‌وزه یاخشی کئشیک چک،
کیشنیش، شۆیوت، تزه تره‌نی ساخلا!

آغ‌قیز اوغلو پیری، سن منی اکمه،
اؤزگه‌نین یوردوندا او دامی تیکمه،
غئیری گؤزللردن هئچ فیکیر چکمه،
سن ائله او گؤزو چره‌نی ساخلا!