الده آینا، گؤزه سۆرمه چکنده
الده آینا، گؤزه سۆرمه چکنده،
آلا گؤزون بولاغیندان اؤپهیدیم.
زنخدانین چئورهسیندن، خالیندان،
قلم قاشین قاباغیندان اؤپیدیم.
زۆلف ایلن بزنیب گلنده اۆزون،
قصد ائدیر یئنه جان آلماغا گؤزون،
وصف-زبانیندان چؽخاندا سؤزون،
دیلین، دیشین، دوداغیندان اؤپهیدیم.
آلایدیم یاشماغین، آچیب کمرین،
چؽخاریب اَینیندن زربافین، زرین،
اییلهییب-اییلهییب زۆلف-عنبرین،
اۆزدن سونرا بوخاغیندان اؤپهیدیم.
گئجه-گۆندوز دوعام بودور تاریما،
نولا سنی سالا بیر گۆذاریما،
ایلهییب-ایلهییب باسام باغریما،
ایکی گۆلگز یاناغیندان اؤپهیدیم.
واقیفین باغرینی دؤندردین کؤزه،
یار اودور کی، یارین جؤورونه دؤزه،
یاریم ساللانیبان گلنده بیزه،
دۆشوبن ال-آیاغیندان اؤپیدیم.