اولمایایدی بئله سفره چؽخماق
اولمایایدی بئله سفره چؽخماق،
بیز یار ایله دانیشمادیق، آیریلدیق.
حالاللاشیب، هۆمّتلشیب دوست ایلن،
تمننشیب گؤروشمهدیک، آیریلدیق.
بیلمم، کیمه دئییم دردیم نئچهسی،
یارین تر ممهسی، سینه هاچاسی.
یوخو منی آلدی گلن گئجهسی،
گۆل اۆزوندن اؤپوشمهدیک، آیریلدیق.
بیز دویمادیق یارین شیرین دیلیندن،
شکر پارچاسیندان، لب-بالیندان،
مینا گردنیندن، اینجه بئلیندن،
حاییف اولدو، ساریشمادیق، آیریلدیق.
واقیفم، اۆستومه گلمز خاص الی،
سیلینمهدی هئچ کؤنلومون پاس الی.
نه مۆدّتدیر، جانان بیزدن کۆسهلی،
کؤنلون آلیب باریشمادیق، آیریلدیق.