ای حوری لیقالیم، ملک سیمالیم

ای حوری لیقالیم، ملک سیمالیم،
گؤزللیکده اولماز کیمسه سن کیمی!
آل یاناغین حلقه-حلقه یانیندا
بنفشه زۆلفلرین یاسمن کیمی.

گردنینده تئللر نه گؤزل تئلدی،
اونلارین مسکنی او نازیک بئلدی،
نه سنگ-مرمردی، نه برگ-گۆلدی،
بو آغ اندام کیمی، بو بدن کیمی.

قامتین تک هئچ بیر قامت بیچیلمز
دوداقلارین تر قؤنچه‌دن سئچیلمز،
بۆلبول جه-جه ووروب گۆللر آچیلماز،
بئله شیرین-شیرین سن گۆلن کیمی.

نه خوش سیتمکارسان ظالیم و خونخوار،
اونون اۆچون سندن چوخ گیلئییم وار،
بیلمنم کی، سنه نه دئمیش اغیار،
خیالیندیر مندن گئنه گئن کیمی.

واقیفی مؤحنت و فراقا سالما،
اغیارین سؤزونو قولاغا سالما،
منی اؤز دریندن قؽراغا سالما،
هئچ عاشیق تاپیلماز سنه من کیمی.