منو
داها ناغیللارا اینانمیرام من
چاپیب اؤز آتینی آغ‌آت‌لی گئت‌دی،
آتلاری شیمشک‌دن قانادلی گئت‌دی،
اوشاق یادداشی‌می قانات‌دی گئت‌دی،
داها ناغیللارا اینانمیرام من.
ننمین اینامی، دردلی ناغیللار،
نامرده آلدات‌دی مردی ناغیللار،
بیزی یوخولارا وئردی ناغیللار،
داها ناغیللارا اینانمیرام من.
اوشاق اوووتماغا بیر نوغول ایدی،
سؤزلرده یاشایان بیر عقل ایدی،
یاخشی آداملار دا بیر ناغیل ایدی،
داها ناغیللارا اینانمیرام من...
«سیم-سیم»ی سؤزله یوخ، زورلا آچدیلار،
تیلسیمی مین جۆره یوللا آچدیلار،
هیم-جیمی مؤهورلو قوللا آچدیلار،
داها ناغیللارا اینانمیرام من.
فاطمالار آیاغی کندیرده قالمیر،
خمریمیز کۆت گئدیر، تندیرده قالمیر،
قارغالار تۆلکویه داها آلدانمیر،
داها ناغیللارا اینانمیرام من.
آجی حقیقتلر بال دادیر ایندی،
آری‌سی اولمایان بال ساتیر ایندی،
کئچه‌لی ساچ‌لیلار آلدادیر ایندی،
داها ناغیللارا اینانمیرام من.
ائله یوخولاردا آتلار کیشنه‌دی،
دیولری قازانا سالدیم، بیشمه‌دی،
گؤزلدیم گؤیلردن آلما دۆشمه‌دی،
داها ناغیللارا اینانمیرام من!..