هر گئجه
شهرزاد کیمی
ناغیل دانیش.
اویدور، گئچمیشدن، گلهجکدن.
آماندیر، ناغیلارین قورتارماسین،
بیز اویاناجاغیق
بیز اویانان کیمی سن اؤلهجکسن.
دانیش،
بیزیم شهرزادیمیز،
بوغازیمیزا ایلگحلی چاتیمیز،
آیاغیمیز آلتیندا
سنین چون حاضیرلادیغیمیز
خیالیمیز.
اوچان کیمی
کندیردن ساللاناجاغیق،
سنین خئیر-دوعانلا
او دونیایا یوللاناجاغیق.
جنّته دوشسک
بیزده بیر گون گؤرهجهییک.
جهنّمده اولساق
تزهدن دیریلهجهییک.
تزهدن باشلایاجاق
بو دونیانین ایشلری،
شئیطانلار اللرینده شیشلری
اووماق ایستهینده گؤزوموزو
تاپمایاجاق!
اوردا گیزلننلر اولاجاق
سیاهیلار اوخوناندا
بعضیمیزی تاپمایاجاق،
قارالاجاق قانلاری
گؤرنده کی جانیمیزا
تاثیر ائتمیر قیر قازانلاری
دیلیمیزدن آسماق ایستهیهجکلر
گؤرهجکلر چوخدان کسیلیب
اوندا شئیطانلار گولوب،
تورپاغین اوستون کسدیریب
دئیهجکلر:
جهنّمدن جهنّمه خوش گلدینیز،
حئییف الی بوش گلدینیز.
بیزدن تئز ترپنیب
اورداکی شئیطان،
ایندی تئیلهسین گورداکی شئیطان؟
کسیلمهیه باشینیز یوخ!
آسیلماغا دیلینیز یوخ!
یاندیرماغا جانینیز یوخ!
... هله لیک سن دانیش!
بیزیم شهرزادیمیز.
گؤزلهیهجهییک ناغیلارین بیتهنه قدر!
گوناهلارین ناغیللاردا ایتهنه قدر!
اؤلن اؤلهجک
قالان قالاجاق،
بئله سنین ... قدر!
دانیش،
یالانلارین جوجهرییب
یئتهنه قدر!!
بیتمهسهده عیبی یوخ!
بیز بیر-بیر اؤلهجهییک
ناغیللارین بیتهنه قدر!