سن نیه دییشدین

سن نیه دییشدین، یاز بولودوتک؟
یوماز گۆناهینی بیر دنیز سنین.
سن ایندی لچگی تؤکولموش چیچک؛
بئله‌می بؤیوتدو کندیمیز سنی؟!

سؤیله، کیم قالیب کی، عشق اوممایاسان؟
قوی دئییم.
اؤزون ده، بیل کی، نه‌چی‌سن:
عؤمرونده بیر قزئت اوخومامیسان،
مودا ژورنالینا آبونه‌چیسن!

بیر قلبین اۆستونو دومان، چن آلدی،
بویالار اۆزونه یاخیلدیغی گۆن.
عۆلوی محبّتین عؤمرو قؽسالدی،
دونونون الگی قؽسالدیغی گۆن!

دئمه کی، بختیمین گۆنشی سؤندو،
دئمه کی، پیس گؤزون گیرینه دۆشدوک.
کسدیگین هؤروکلر جۆت یولا دؤندو،
هره‌میز بو یولون بیرینه دۆشدوک.

سن منده آجی بیر خاطیره قویدون،
سنی خاطیره‌ده تاپام، سؽغینام!
آیریلیق چتیندیر...
بس نئجه قؽیدین
چاتیلمیش قاشلارین آیریلیغینا؟!

دئ نئجه باخیرسان سن گۆله-گۆله؟
روحومو یئنه بیر هیجران اوخودور.
بویادین گؤزونو قارا خطّ ایله
ساندیم ایلک عشقیمین نئکرولوقودور!

عؤمرومون قؽریلمیش بوداغینداکی
محبّت آدلانان سون یارپاقمیسان؟
بویا یوخ!
قانیمدیر دوداغیمداکی
سن منیم قلبیمی پارچالامیسان.

دویغولار الینده بؤلوندو ایکی،
بیلمزدیم عؤمرومه سرت آیاز سنی.
ائله دییشیبسن گؤرکمینی کی،
ایندی هئچ آنان دا تانیماز سنی!..

دئمه کی، بختیمین گۆنشی سؤندو،
دئمه کی، پیس گؤزون گیرینه دۆشدوک.
کسدیگین هؤروکلر جۆت یولا دؤندو،
هره‌میز بو یولون بیرینه دۆشدوک!..