سن دئمه تزهدن سئومک اولارمیش،
طالع ده تزهدن گۆله بیلرمیش،
کۆسوب گؤزویاشلی گئدن محبّت
پئشیمان-پئشیمان دؤنه بیلرمیش.
اۆرک بولود کیمی بوشالیرسا دا
دئمک بولود کیمی تزهدن دولور.
سونونجو شعلهسی تیترین شمعدن
آیری بیر شمعی ده یاندیرماق اولور.
سن دئمه تزهدن سئومک اولارمیش،
کؤهنه یارالاری واخت، زامان سیلیر،
کسیلن بوداقلا اؤلن آغاجلار
تزه پؤهرهلرله دیریله بیلیر.
آغلایا-آغلایا دۆنیایا گلیب
بیز آنا سۆدویله گۆلممیشیکمی؟!
هر آخشام ساپساری باتان گۆنشی
هر سحر تزه-تر گؤرممیشیکمی؟
سن دئمه تزهدن سئومک اولارمیش،
سئوگی فورصت دئییل قوش کیمی اوچا.
نه ده کؤلگهدیر کی،
قاچاسان قووا،
یا دا سن قوواسان
او سندن قاچا...
چؽخارسان قلبیندن اؤتن سئوگینی،
بیر گۆن ده تنهالیق سؽخاجاق سنی.
کیمهسه ائتدیین یاخشیلیق کیمی
محبّت قارشینا چؽخاجاق سنین.
ایلک سئوگی یووادان دۆشن قوشجوغاز،
کؤرپه قانادلاری پؤهرلنمهییب.
مجنونون آهییلا اوچان محبّت
مین حیله الیله یئره ائنمهییب...
من کی گؤرممیشم سئوگینی سوسان،
محبّت زیروهده بسلنن قارمیش.
کیم دئییر بیر دفعه سئویلیر اینسان،
سن دئمه هر زامان سئومک اولارمیش...