نئیله‌ییم؟

بو تبسّوم بیر چیچگین ایزیدی،
آلا گؤزون بولاقلارین گؤزودو،
اۆرگیمده محبّتین اؤزودو،
اۆرگیمله باجارمیرام، نئیله‌ییم؟

هر ائیهامین بیر تیلسیمه آچاردی،
دیل بیلسه‌یدی داش دا کؤنول آچاردی.
عاقلیم سندن اوزاقلاشار، قاچاردی،
اۆرگیمله باجارمیرام، نئیله‌ییم؟

بو اۆلفتین سونو هیجران دئییل کی،
دیلیم توتمور ایسته‌ییمی دئییم کی.
سنه گلن یوللاریمی اییم‌می؟
اۆرگیمله باجارمیرام نئیله‌ییم؟

گؤزله‌ییرم...
هر دقیقه‌م ایل اولور،
سن گلیرسن، هر لپیرین گۆل اولور.
قلبیم یئنه قولو باغلی قول اولور،
اۆرگیمله باجارمیرام، نئیله‌ییم؟

اوشاقلیغین هاواسی وار باشیندا،
اۆرگیمین خنجری وار قاشیندا.
دئ، سئویم‌می من ایندی بو یاشیمدا؟
اۆرگیمله باجارمیرام، نئیله‌ییم؟