منیم بو شهرده کیمیم وار آخی؛
هر قاپی دؤیمهیه الیم گلمییر.
اۆزومو طالعه توتوب گئدیرم،
طالع ده همیشه اۆزه گۆلمییر...
آیاغیم آلتیندا تانیش سکیلر،
اؤنومده آچیلان منظره بوزدور.
چوخدان کؤهنلیبدیر اینیمدهکیلر،
نه قدر چؽرپسام دا
یئنه ده توزدور.
گؤزدن اوخویورام بیج تعریفلری،
مقصدلی ساغلیقدیر حرصیمی بوغور،
کیمینسه باشلاییر حسد آغریسی،
منیمچون تئلئفون هدهسی دوغور...
منیم بو شهرده کیمیم وار آخی؛
طالعین وئردیی پایا – پاخیللیق،
بویو کی من اؤزوم قازانمامیشام،
اللهین وئردیی بویا – پاخیللیق.
منیم بو شهرده کیمیم وار آخی؛
کؤهنه محبّتین قؽز تانیشلاری...
هر سحر گؤردویوم اویاق بیر یوخو،
سلام تانیشلاری،
اۆز تانیشلاری...
بیر ده ایلهامیمین تانیش نفسی،
اونون دا کۆسولو آنلاری چوخدور،
هفتهنین بئشگونلوک قازانج قفهسی، -
بس ائدر...
نفسیمین گؤزلری توخدور...
منیم بو شهرده کیمیم وار آخی،
بو عؤمرون سونونا گۆمانیم آزدیر.
سیّاح آیاقلاریم،
فهله اللریم،
بیر ده کی دۆنیایا باخدیغیم گؤزدور؛
چیچکلری گؤرور،
تیکانی گؤرمور،
اۆستونه فؽرلانان سۆکانی گؤرمور،
اوشاق گۆلدورمهیه کؤکه آختاریر،
الیندن آلینان تیکنی گؤرمور...
یاخشیلار یولوندا چؽراق کیمیدیر،
یامانلار تۆلکوتک پوسقودا دوروب.
سئوینج ده بیر شۆشه عرق کیمیدیر،
اونو دا وردیشلی عیّاشلار ووروب...
سیزه گۆونیرم، یاخشی آداملار،
سیزین آدینیزا گلمیشم بورا.
قارداشتک، اوغولتک قورویون منی،
بیر اینسان عؤمرونو ووروم آخیرا؛
منیم بو شهرده کیمیم وار آخی...