ای دمادم ائیله ین تکلیف مسجید قؤوسی یه

جسم زاریمدان منیم هیجران نه ایستر بیلمنم،
بو سینیق کشتی دن اول توفان نه ایستر بیلمنم؟
منده یوخ هیچ آرزو، کؤنلوم هامان بیتاب دیر،
زخم یوخدور، سینه ده پیکان نه ایستر بیلمنم؟
چشم خونخوارین سنین جیسمیمده چون قان قویمادی،
قانی دولموش دیدۀ گریان نه ایستر بیلمنم؟
کاسه-کاسه قان وئریر شوکر ائیله‌ییب نوش ائیلرم،
دخی مندن گردش دؤوران نه ایستر بیلمنم؟
هر نه وار عالمده بیر-بیردن بئتر سرگشته دیر،
قطره عمان آختاریر، عمان نه ایستر بیلمنم؟
لاله ایستر داغینا مرهم نسیم صوبح دن،
آغیز آچمیش غنچۀ خندان نه ایستر بیلمنم؟
عاشیقین زنجیری تار زولف و کاکیل دن گرک،
ریشتۀ زوناری دن «صنعان» نه ایستر بیلمنم؟
جان چو جانان مالی دیر، بس دخی مندن دوست لار،
جان نه ایستر بیلمنم، جانان نه ایستر بیلمنم؟
گؤوهر غلتان گؤزو تاج بلند اخترده دیر،
قطرۀ گمنام سرگردان نه ایستر بیلمنم؟
قاشی یایین دان اونون یارب، بو هامی غوربیله،
ناوک برگشتۀ مژگان نه ایستر بیلمنم؟
ای دمادم ائیله ین تکلیف مسجید قؤوسی یه،
عاشیق بیتابده ایمان نه ایستر بیلمنم؟