ناله سیندن درد سر چکدین مدارا ائیله دین

گئتمه باشین صدقه سی، ای سرو خوشرفتار گل،
گئتدیم الدن، ای دولانیم باشینا دیلدار، گل!
گلدی ایام باهار و شور دوشدو عالمه،
گل نه دورموسان دخی، ای ساقی خونخوار گل!
ناتوانلیقدان یامان دوشدوم منی بی دست و پا،
گل الیمدن توت، آیاغین صدقه سی، ای یار گل!
غنچه یه پروانه تک بولبول دؤنوب تکرار ائدر -
کیم، یئرین بوش دور سنین، ای شمع گولروخسار گل!
جان نثار ائتمکده بیر عؤمر انتظارین چکمیشم،
ائی طبیب بی مروت تا حیاتین وار گل!
ناله سیندن درد سر چکدین مدارا ائیله دین،
ایندی کیم دیلدن دوشوب دور قؤوسی بیمار، گل!