ایلاهی، قیل کرامت هر کسه بیر دیدۀ بینا

سعید اونسی زاده یه

الا، ای مخبر صادق، اعلاالدین والدنیا،
سواد نورپاشین دیر بیاض عالم معنا.
سعید ائتمیش سنی روز ازلده خالق یکتا،
جلالین ناقص اولماز ائتسه‌لر یوز مین حسد ادا.

اولوم ای همتین قربانی، بیر درک ائت بو معنانی
کی، ائیلر عرض اشعارایله بو خاقانی ثانی -
کی، وار روسیه نین بئش آلتی میلیون جان مسلمانی
قالیب علم و منافع ده تماماً بی سر و بی پا.

آچیب روسیه باب منفعت جمله رعایایه،
دمادم شوکرلر ائتمک گرک بو فیض عظمایه،
مساویت وئریب دیر سیلک ادنا، فوج اعلایه،
برابردیر دخی دیوانده اعلا ایله ادنا.

رعیت اوغلو اولسا بهره ور گر علم و معنادن،
اولور شایستۀ خدمت، آلیر چین شاه والادن،
خدا راضی اولا بو امپراطور موعلادن
کی، شامل دیر جاهانه تئیزی چون خورشید نور افزا.

آچیب هر قسم مکتبخانه‌لر بو منبعی احسان،
بحمدالله کی، یوخدور تربیت بابیندا بیر نقصان،
ثنای مکتبین قافقازده ائیلر بو ایل بنیان
کی، تا صنعتدن اولسون بهره ور هر ساعی و جویا.

بو ایل کیم، آسیای شرق دن دیر فتنه‌لر پیدا،
نمایاندیر هرات و کابل و هم مرو دن غوغا،
بو آشوبه او مفسدلرکی، باعث دیر، خداوندا،
ذلیل ائت اونلاری، مغلوبو مقحورایله، هم رسوا!

نئچه نراد قورموش تختۀ نرد ملک دنیام،
سالیب دیر شش جهتدن شش دره ایران و تورانی،
قالیب شش درده، تاپماز یول گشاده تورک لر خانی،
شش و پونچ آتراغی مشکلدو تاس قوبۀ مینا.

توتوبدور گرچی رخ بو فیل تن لر ملک افغانه،
پیاده صف چکیب، آتلار دوزولموش صحن میدانه،
وزیر ایستر کی، شه مات اولماسین، سؤیلر حکیمانو،
دؤنوبدور صفحۀ شطرنجه یکسار ساحت دنیا.

دریغا، اهل ایرانین خیال و مدعاسیندان،
خداناکرده ال چکسه حقیقی آشناسیندان،
خصوصاً مالک روسیه تک مشگل گشاسیندان،
ایلاهی، قیل کرامت هر کسه بیر دیدۀ بینا.