ساقی، الین فداسی، دور بیر ایاغ دولدور

گر وصل یار اولماز، من نئیلیرم باهاری،
یوز مین باهار اولسا اولماز کؤنول قراری.
گولزاره گول گلینجه تک بزمه یار گلسین،
هرچند یوخدو یارین بیر گولجه اعتباری.
سونبول خجالتیندن باشین آشاغه سالمیش،
یاریمدا گؤردو یوخسا، اول زلف مشکباری.
عود قوماره بنزر، یارین شمیم زلفو،
بیر تاری بست ائدیب دیر یوز نافۀ تاتاری.
ای دل، الیم اوزولدو اول زلف تاردن کیم،
تاری نصیب قیلسین بیرده گؤروم او تاری.
بیر سرو حسرتیندن هر سو روان دیر اشکیم،
بیر جویه ائتمه نسبت بو چشم اشکباری.
گول گول اولوب سرشکیم، گولزار اولوب کناریم،
من نئیلییم باهاری، یا باغ و لالزاری؟
دفن ایلیین بو نعشیم یوللار کناری اوزره،
شاید کی، قبریم اوسته یارین دوشه گذاری.
ساقی، الین فداسی، دور بیر ایاغ دولدور –
کیم، سیّدین بو شب دن باشیندا وار خوماری.