حاجی مهدی قولویا

حاجی مهدی قولویا

حاجی مهدی قولو، نجیب زامان!
آی سنه جانی سیّدین قربان!
سن محب علی عمران سان،
چاکر آل شاه مردان سان.
حرمتین چوخدو فوج ساداته،
آفرین لر سنین کیمی ذاته!
سؤزه شاهد و جمله اتوارین،
آغا سیّد علی یله رفتارین.
فی الحقیقت او نسل مولا دیر،
آدی کیمی اؤزو ده آغا دیر.
حق اونون، ای گولشن اهل کرم،
ائتمه سین سندن التفاتینی کم.
جدّی اولسون سنین هاوادارین،
حشرده، نشرده نگهبانین.
سنی کوثردن، ای رفیع جناب،
ساقی کوثر ائیله سین سیراب.
کمتری نین بو بینوا سیّد،
سنه دایم ائدر دعا سیّد.
منه بیلدیرکی لطف و احسانین
واصل اولدو، رهینییم آمین.
عوضینده اونون، سنه صبحان
سونداسی جنّت ائیله سین احسان.
لیک، ای تاجیدار، اول خلعت،
وجهی وار، اولمادی منه قسمت.
آلدی الدن او سوبی میر جعفر.
آتاما وئرمرم دخی بو سفر.
دخی بوندان سورا باهار اولاجاق،
باغ و صحرا کی، لاله زار اولاجاق،
گئیه جک سرو خلعت خوزرا،
لاله اینینده سرخ فام قبا.
گئیه جک نخل زومرودین جامه،
غنچه باشیندا یاشیل عمامه.
اولاجاق تخت شاخه گول سلطان،
قیلاجاق باغ فوجینه احسان.
دولاجاق دُرّله لاله نین جامی،
اولاجاق دیر شکوفه بایرامی.
اؤزون انصاف قیل، نجیب زامان،
بو روادیرمی من قالیم عریان؟
بو گئجه خاصه عید عظما دیر،
عید شاهنشه مطلا دیر.
چیخاجاق مسند خلافته شاه،
شیر داور علی ولی الله.
بو گئجه جمله خلق اولور خرم،
بو روادیرمی من توتام ماتم؟
اولا هر خانه شمع ایله روشن،
ائیله ییم ظلمت ایچره من مسکن؟
شمع یوخ، نقل و خشکبانین یوخ،
نسیه آلماغا اعتباریم یوخ.
شاعرم، شعردیر منیم کاریم.
دُرّ شعرایله دولموش آنباریم.
شعره باقّال خشکبر وئرمز،
شعر بیر نخل دیر ثمر وئرمز.
قالمیش ایدیم معطل و حیران،
بیر کسه گوکنییردی هیچ گمان.
ائتدی پیر خرد منی حالی،
ایندی یاز حاجییه بو احوالی.
او سنی، قورخما، شادکام ائیلر،
لطف ایله مغزی المرام ائیلر.
شهرت اوچون او، ائیله مز احسان،
لطفی احسانیدیر اونون پنهان.
اؤزو هنگام جود و لطف و سخا،
گؤرمییرسن، ائدیر کی، شرم و حیا؟
نیه حالین بئله پریشان دیر،
جیرین درد فقردن قان دیر؟
ائدر اول حال زاروه چاره،
ائیله‌مه استخاره بو کاره.
چونکی گوش ائیله‌دیم بو معنانی،
یادیما دوشدو اول کرم کانی.
حق سنین عمروو تأویل ائتسین،
دشمن جانوو ذلیل ائتسین!
یاورین لطف کردگار اولسون،.
گولشن خاطرین باهار اولسون!