حسن بئی ملیک اووا، “اکینچی” غزئتینه یاردیم اوچون

حسن بئی ملیک اووا

“اکینچی” غزئتینه یاردیم اوچون

السلام، ای اهالی ذی شاَن!
ای اولانلار بلا اوخونا نشان.
نه بلا؟ جهل و درد نادانلیق
ای توتان جمعینی پریشانلیق!
نئچه مدتدی کی، حسن بی زار،
حسن تدبیرایله او فخر کبار
اؤز قدیمی لسانیمیزدا هامان،
غزئته چاپینی ائدیب عنوان.
اذن حاصل قیلیبدی دولتدن؛
بیز گرک دم وراق سعادتدن.
اؤزونه گرچی یوخدو فایده سی،
لیک وار خلقه فیض زایده سی.
فیض اول بودور کی، مختصری،
یئتیریر اول جناب هر خبری
اولوروق حال عالمه واقف،
بو بیزه بس دئییلمی، ای عارف؟
فیض ثانی بودور کی، حکمتدن
شرح ائدیر کسب دن، زراعتدن
اکیبن علم تخمونو او جناب،
مزرع عالمی ائدیر سیراب.
اول بیزه بیر سحاب رحمت دیر،
باعث آبروی ملت دیر.
گرچی هر دلده وار غزئت لر چوخ
بیزه اوندان ولیک فایده یوخ.
بیلمیریک روس، یا فرنگ دلی،
هر دلین رمزینی اؤز اهلی بیلی
بیزده یوخ روسی، هم فرنگی سواد.
اولموشوق تورکی، فارسییه معتاد
اونو دا هیچ بیلمیریک کامل،
اکثر خلق عوام دیر، جاهل.
بس “اکینچی” بیزه مناسب دیر
قیمتی یاخشی، مال کاسب دیر.
بس “اکینچی” جلالیمیزدی بیزیم،
ناصحی خوشمقالیمیزدی بیزیم.
سعی ائدین، ای گروه نیکصفات!
ائتمه سین تا بیزیم “اکینچی” وفات.
سونرا گؤی دن اگر ائنه عیسی
ائده بیلمز او مردنی احیا.
ای “اکینچی” خرید ائدن کس لر
وئرمه سه جنگ دن “اکینچی” خبر،
غزئته ترکین ائتمیین زنهار،
نه گرک دیر بیزه او نقل و گذار
قدغن دیر او نوع صحبت لر،
ائشیدین پندلر، نصیحت لر.
بیز گراک سعی ائدک معیشت اوچون
صنعت و کسب اوچون، زراعت اوچون.