باکی شاعرلری نین تعریف لری

باکی شاعرلری نین تعریف لری

شیروانه باکی دان یئنه چوخ تحفه‌لر گلیر،
سان مصر کاروانی آچیلمیش، شکر گلیر.
نازل اولوبدو آیۀ رحمت شماخییه،
طولانی شکرلر ائله سین، مختصر گلیر.
اشعار روح بخشدی، یا معجزۀ مسیح،
عزم رمیم زنده اولوب تازه تر گلیر.
آب بقایه یئتمییمیز اولدو آشکار،
ظلمات غمده خیضر بیزه راهبر گلیر.
یعقوبه یئتدی پیرهن یوسف عزیز،
چشم امیدواره ضیای دیگر گلیر.
اولدو باهار فصلی، آچیلدی شکوفه لر،
نقل امیده، شکر کی، ای دل، ثمر گلیر!
جورمی ائدیبدی جورموموزو عطف ظاهراَ،
اول بحردن بو ساحله دُرّ و گوهر گلیر.
صد شکر، عفو اولوبدو، کؤنول، جرم مامضا،
لطف عالمینه اول شه خورشید فر گلیر.
ائتمیش او شه غزال ختن صیدینه هوس،
شعریندن ایندی رایحۀ مشک تر گلیر.
سالیک نه سیلک شخصدی ظاهر دئییل بیزه،
اما وجودی بیزلره اهل هیمرگلیر.
شعرینده درج اولوبدو معانی بی شمار،
مودن لطیف نکته سی باریکتر گلیر.
شیرای شعری نور وئریب دیر منیری نین،
چرخ اوزره مشتری اونا شمس و قمر گلیر.
طبع منیری شمس و قمردن منیردیر،
باخدیقجا شعرینه گؤزه نور بسر گلیر.
عاشیق اولوبدو نظم ثریایه فرقه دان،
کمتر سرایه بیر بو صفت تاجور گلیر.
پروین مثال نظم ثریاده لطف چوخ،
اول اختر منیره سوها بی سپر گلیر.
شیرای شام دیر، اونا کلب الجبار من،
بیر استخوان لطف ایله اول شاه اگر گلیر.
دلخون تخلصونده بو رمز اولدو آشکار:
عاشیقدی، چشمدن اوزه خون جگر گلیر.
قان ائیله‌ییبدی کؤنلونو بیر لاله اوزلو یار
کیم، سینه سینده داغ لری سربسر گلیر،
میرزه مُصوّرین قلم مشکبارینا
چین دیر، دئسم مداد سیه مشک تر گلیر.
هر نقش کیلکی مانی نقّاشی محو ائدیب،
آیینۀ خیالینه رنگین صور گلیر.
مشتاقین اشتیاقی ائدیب زار کؤنلومو،
بیلمم نه گون شماخییه اول خوش سیر گلیر؟
مدتدی بادکوبه نی اول مسکن ائیله‌ییب،
نه بیر پیام قاصدی، نه بیر خبر گلیر.
ای بیوفا، نه دن دی بیزی یاد ائتمه سن،
گؤندر دعا او وقت کی، باد سحر گلیر.
تاب ائتمدین جفالره قاچدین شماخی دن،
میدان عشق دیر، بونا صاحب جگر گلیر.
وئردین منی بو کافر اولان بت لره اسیر،
بیر بیلمدین کی، باشیما آخر نه‌لر گلیر.
غم چکمک اولدو سن گئدنی کار و باریمیز،
سنسیز بلالی باشیمیزا یوز خطر گلیر.
بیر سنگدل نگاره گرفتار اولموشام،
نه سوز شب، نه آه سحر کارگر گلیر.
یاد روخیله چشمیمه عالم گلیر بهشت،
ذکر لبیله آغزیما طعم شکر گلیر.
چکسم بیانه صورت حال نزاریمی،
آیینۀ خیالوه غمدن کدر گلیر.
قوی سؤز آچیلماسین، غمی بیگانه بیلمه سین،
هرچند داغ خامه یه، جولانه پر گلیر.
مندن دئیین مُصَوّره شیروانه گلمه سین،
سرمایۀ کمالما گلسه ضرر گلیر.
قیرخیب شماخی دن یولا ساللیق پراق تک،
گر جنگ غافله او سگ کوزه گر گلیر.
بونلار زرافت ایدی کی، اولدو مُصَوّره،
چون طیبات اهل دیله نیک تر گلیر.
گلسه باهار فصلی مُصَوّر شماخییه،
بالله، باهارین اوسته باهار دیگر گلیر.
بیر یئرده کیم، مُصَوّره سیّد غلام اولا،
سایرلری جنابینا بیر خاک در گلیر.