اوغورلو بئی شیخ علی بئی اووا

اوغورلو بئی شیخ علی بئی اووا

آلیشانا، سنه دایم اولا الله کمک،
حکموه تابع اولا امر قضا، دؤور فلک؛
گر سنین ایجامین ایله ائیله‌مه سه دؤور زمین،
اولسون اجزای فلک بیر بیریندن منفک.
وارمی یادیندا کی، اول مجلس عشرتده منه
کئچن ایل مُلک قَشَتده نه برات ائیله‌دی بگ؟
بیر تاغار بوغدا ایدی شفقتی آلیشانین،
بیرده یازدا آپارام یعنی بوزولو بیر اینک.
ائوه گلجک ائله‌دیم نقل اینک صحبتینی،
نهره سین چالخاماغی باشلادیلار اؤیرنمک.
بیر نئچه کندی دخی بوغدایا حاضر ائله دیک
کی، گلن وقت سرانجام اولونسون بی شک.
بیر نئچه وقت کئچیب اولمادی بوغدا حاصل،
فکر قیلدیم کی، هله یاخشی دئییل دیر دینمک.
دوغمویوبدور او اینک بلکه هله، صبرائیله،
صبر “مفتاحی فرج دیر”، کیشیده صبر گرک.
بلکه چوخ پالچیق اولوبدور قشتین یوللاری،
چیخا بیلمیر یوخوشو یوک لو اولان آت، ائششک.
گؤزله یک بلکه اینک له بئله گلسین بوغدا،
یاز اولار یول قورویار، سهل اولو بوغدا اکمک.
لیک بیر ایل کی تامامی اولدو، بو اولدو معلوم:
آلیشانین غرضینده یوخ ایمیش شئی وئرمک،
فکر قیلدیم کی، بو احوال خجالت خبری
فی الحقیقت کی، دئییل یاخشی کریم بئی بیلمک.
هم بو کیفیتی فی الجمله اوغورلو بئی دن
واجب اولدور کی، یازیب کونهونو تحقیق ائله مک.
فکری وئرمک دیر اگر، بیر بئله تأخیر ندیر،
وار ایسه اؤزگه خیالی، اونو دا فکر ائتمک؟
سیّدا، بسدی بو بیهوده خیالیندان اوسان،
لوح دلدن بو خیالات روقومین ائله حک (؟)
بو نه بوغدادی کی، هر لحظه تمناسی ایله
گاه اون تک آغانب، گه سارالارسان جو تک.
بو هامان بوغدادی کیم، آدمی جنّتدن ائدیب،
بو هامان بوغدادی، حوا باشینا گتدی کلک.
اول کی تقدیر سنه قسمت ائدیب دیر روزی،
اولاسان قانع اگر “لا تَخَف اللهُ مِعَک”.