نصرالدین شاهین هجوینده

نصرالدین شاهین هجوینده

ناصرالدین شه عادل کی، صمیم دلدن،
عمر طولانیدی حق دن اونا دایم دلییم.
گزدی روسیه نی، هم رم و فرنگستانی،
توتدو آوازه سی آفاقی، آچیلدی اورییم.
خلق دئرلردی کی، اسکندر ثانی دیر شاه،
بو سیاحتده داخی قالمادی بیر ذره شکیم.
بو خبر چیخدی کی، ناگاه گلیر شیروانه،
او گول گولشن ایران، آچیلدی چیچییم.
هر او شخصین کی، ائوی اوچموش ایدی، زلزه له دن،
دئدی کیم، شاه گلیر، اویدو قیزیل دان دیرییم.
شعرا، هم فقرا جمله سی گؤز دیکدی یولا،
فی الحقیقت کی، ره شاهه دیکیلدی بییم.
من ده بیر تورکی قصیده یازیب انشا ائله دیم،
دوزلو، شیرین سؤز ایدی، نه اؤزومو نظمه چکیم.
حقی، ظنیم بودو کیم، سؤز تانییان کیمسه‌دی شاه،
سایۀ قادر صبحان اولاجاق دیر کمکیم.
قصه کوته، گئجه دن بیر نئچه پاس اؤتموش ایدی،
شهره شه وارد اولوب یاتدی، قوتاردی کوله ییم.
صبح میندی کاروتا*، سرعت ایله اولدو روان،
التفات ائتمه‌دی بیر شخصه نه عارف، نه حکیم،
توتدولار خلق چؤرک، کسمه‌دی چون بیر لقمه،
گؤروب اول صورتی بیلدیم کی، کسیلدی چؤره ییم.
نه منیم شعریمه باخدی، او نه درویش لره،
دئدی: بو خلق دن افضلدی منه بیر قپه ییم.
دئدی لر کیم، منه بو قصه یه یاز بیر تاریخ،
من دئدیم کیم، دئمنم، ضایع اولوبدور امه ییم.
لیک سیّد دئدی تاریخینی، بیر اکسیگی وار،
نیه گلدی، نیه گئتدی بو†
——————————————-
* کارئتا.
† سون مصراع ابجدله حسابلاندیقدا ۱۲۸۱ جی ایل آلینیر.
بو رقمه بیر علاوه ائتدیکده و میلادی تاریخه
چئویردیکده ۱۸۶۵ جی ایل آلینیر.