قاضی حاجی موللا محمد ملیک کندلی یه

قاضی حاجی موللا محمد ملیک کندلی یه

گؤرموشم خطۀ اسلامده بی حد قاضی،
وار هر ملکده یوز موللا و هم صد قاضی،
رسم قانوندو ازل دن کی، اولور بد قاضی،
لیک من گؤرمه‌میشم بیر بئله مرتد قاضی،
هانسی قاضی؟ دئسه لر، موللا محمد قاضی.

وه نه قاضی کی، لعین ابن لعین ابن لعین،
ملحد و مفسد و مردود و شقی، دشمن دین،
اولاجاق دیر اونا آخردا غنیم شرع مبین –
کی، قیلیب قاضی لیگی جیفۀ دنیایه کمین،
ائیله‌ییب دیر اؤزونو نفسه مقید قاضی.

ایکی کس شرعه گئدیب، وئرسه بیری ایکی مانات،
سؤز اونون دور کی، وئریب پول، نه غم، تاپدی نجات،
تئز یازیب حکم وئریر قاضی شیرین حرکات،
بو طرف دن وئره مغبون اولان اوچ دانه مانات،
فی الفور یازدیغی حکمون ائلیر رد قاضی.

تنگ اولوبدور بو شریرین ستمیندن عالم،
یوخدو بیر کیمسه کی، شریندن اونون چکمه یه غم،
فقرایه بو قدر کیم، ائله ییر جور و ستم،
بو سؤزو باور ائدین، قادر قهاره قسم،
یاناجاق نار جهنمده مخلد قاضی.

دورسا اؤز قاضی لیگینده دؤیو چوخدا نقصان،
دئیریک: نئینک، ائدیب قاضی لیگی هئیی نان،
گونده بیر صورته تبدیل اولو مثل شیطان
گاه یاسوول دو، گهی میرزه، گهی رشوت آلان،
دؤیو بیی فاسق زنقهبه مجرد قاضی.

گاه گئدیر مصره، گهی کوفه یه، گاهی حلبه،
گاه افندی اولو، گاه سوخته، گاهی طلبه،
گاه ائدیر قاضی لیگی پیشه مثال کسبه،
قورخورام سیّد اولا، ال قاتا آخر نصبه،
منی باری گؤتوره اولادینا جد قاضی.

آنناماز هئچ سؤزون حساب و بی حسابی سین،
اسقییار گونده مینیب کندلری قیرخیق یابی سین،
جرا ائدیب باشینا هاردا آدامین قلابی سین،
ایلده بیر یول تانیماز مسجید و معبد قاپی سین،
ائتدی مفرد خانانی مسجید و معبد قاضی.

گئتدی صد حیف، آ کؤپک، تارخانوون دورانی –
کی، تاپایدم اونا بیر ماه صفت اوغلانی،
حاج کمال اوغلو تقی کیمی تاپایدین نانی،
ائیله ییدین یئنه قاضی اولوبان دیوانی،
ائیله ییدی سنی بو ملکه مجدد قاضی.

ایسته سن خلقین اگر کؤنلونو راضی ائده سن،
جمله تسحیر دل اهل اراضی ائده سن،
بس گرک آروادوون فعلی نی ماضی ائده سن،
جهد قیل کی، بالا قارداشوو قاضی ائده سن،
لوتولار تولاماغا یاخشیدی امرد قاضی…