منو
ائدیب دیر شیشه ایچره ترک باده
عبدالله بئی عاصی یه
ایلاهی، مسجیده میخانه دؤنسون،
تؤکولسون باده سی پیمانه دؤنسون!
اولا میخانه بایقوشلار یاتاغی،
اوچوب بیر منزل ویرانه دؤنسون!
نه گول دن اؤترو بولبول ناله ائتسین،
نه دور شمعه بیر پروانه دؤنسون.
پوزولسون رونق اوردوبهشتی،
گولوستان جاهان نیرانه دؤنسون!
صفای کاینات اولسون کدورت،
بو عالم خلق اوچون زندانه دؤنسون!
سنین مین بعد، ای رند خرابات،
شراب لعلفامین قانه دؤنسون!
نئچون کیم، عاصی زار و فتاده
ائدیب دیر شیشه ایچره ترک باده.
ائدیب تأثیر اونا زاهد کلامی،
سالیب گؤزدن شراب لعلفامی.
چکیب ال خوب لر زلف کجیندن،
عبادتله کئچیردیر صبح وشامی.
دیل عاشیق تک اول سنگین دل ائتمیش،
شکسته ساغر و مینا و جامی.
ته خومدا فلاتون کیمی باده،
قالیب ذلتده، یوخدور احترامی.
پوزولدو کعبۀ ارباب حاجت،
صفادن دوشدو مئی کش لر مقامی.
شراب ناب باغری دؤندو قانه،
اولوب مئی کش لرین ساغر حرامی.
اولا خاک ایله یکسان بار ایلاها،
نه کیم، میخانه وار سقف ایله بامی!
نئچون کیم، عاصی زار و فتاده
ائدیب دیر شیشه ایچره ترک باده.
شکست اولسون خوم صهبای خوللر،
تاپا میخانه لرده زیب منبر.
مغنّی ترک اولوب میخانه لردن
اوجالسین نالۀ الله و اکبر.
تؤکولسون خاکه اشکیم تک او مئی کیمی،
جمال یار اوچون اولموشدو مظهر!
نه بنگ اولسون جاهان ایچره، نه باده،
نه جام اولسون، نه مینا و نه ساغر!
میزاجی درهم اولسون سلسبیلین،
دؤنه زقّومه، یارب، آب کوثر!
اساس عشرتیم تک برهم اولسون،
فلک دن عقد پروین، قطب محور!
جاهان ملکونده اولسون باده نایاب،
بسان کام نایاب سکندر!
نئچون کیم، عاصی زار و فتاده
ائدیب دیر شیشه ایچره ترک باده.
خراب اولسون فضای گولسیتانلار،
خزان جوریله اودسون باده قانلار!
قوروسون شاخ و برگ تاک انگور،
علی قوینوندا قالسین باغبانلار!
وصالی دوختری زیبای رزدن
اولا محروم، یارب نوجوانلار!
ائدیب ساقی لرین زلفون پریشان
توتا مئی دامه نین پیر مغانلار!
سرود شعرله مئی ماتمیندن
جاهان ملکونده قالسین داستانلار.
اولا میخانه‌لر ویرانه، یعنی
پوزولسون رونق دار الآمانلار!
ایلاهی، گؤرمه سین مین بعد مئی دن،
صفا و ذوق و آسایش جاوانلار!
نئچون کیم، عاصی زار و فتاده
ائدیب دیر شیشه ایچره ترک باده.
اگر مئی اولسا کوثردن عبارت،
دخی سیّد، یوخوم دور هیچ رغبت.
مئی گولفامدن استغفرالله،
منو سجاده و کنج عبادت.
شکست ائت، بیخدا، جام شرابی،
درست ائت، زویا، اسباب طاعت! اویان،
غافل، گؤتور ال جام مئی دن،
سنی مست ائتمه سین بو خواب غفلت!
گؤزون یوم، دیده، روی دلستاندان،
شراب نابه، راغیب، ائتمه رغبت!
صفا، دوشسون صفادن طبع پاکین،
ظهور ائتسین ظهوری دن کدورت.
پوزون، ای دوستان، دیوان شعری،
مئی و محبوب دن ائتمین روایت!
نئچون کیم، عاصی زار و فتاده
ائدیب دیر شیشه ایچره ترک باده.