حاجی عبدل احد شیروانییه

حاجی عبدل احد شیروانییه

گلدی نوروز، نگارا، یئتیشیب فصل باهار،
گول آچار پرده جمالیندان، اولار بولبوله یار،
صحن گولزاره اولور باد صبا عطرفشان،
باغده سونبول آچار سلسلۀ غالیه بار.
ائده جک لر هامی سی لحن حجاز ایله صدا،
دولاجاق شور و نوا ایله بو فیروزی حصار.
طوطی توتک چالاجاق باغده، بولبول بالابان،
گله جک صوت دف و موسقی و موسیقار،
ائده جک راست ابولچپ دخی ترک و تاجیک.
فصل نوروز رهاوندی اوخور سَلسَل و سار.
نه روا بیر بئله موسمده، نگارا، آخر،
بخت و دولت کیمی مندن ائده سن سن ده فرار؟!
گول اولا بولبوله هارادم، من اولام هجره اسیر،
ائیله یم شام و سحر فرقت ایله ناله و زار؟
بو قدر ائیله‌مه بو شیفته یه جور وجفا،
بو قدر عاشیق دلخسته نی سن ائیله‌مه خوار.
دیلبرا، یاخشی دئییل دیر بو حکایه سندن،
ائیلرم یوخسا کی، بیر ذاته شکایت سندن.
همدمیم سن تکی تا یار مئی آشام اولدو،
او قارا زلف بلاسیله گونوم شام اولدو،
تؤکولوب زلف سیه توتدو رخ رخشانین،
دئدیم: ای وای، یامان یئرده گون آخشام اولدو!
دئدیم: ای شوخ، هاچان سندن اولور کام روا؟
دئدی: ناکاملیق عشق اهلینه بیر کام اولدو.
یار اولوب اؤزگه‌لرین یاری، ائدر ذوق و صفا،
دیل شوریده عبث عشقده بدنام اولدو.
گلدی نوروز، مزیّن ائله‌دی دنیانی،
بولبول خسته یه گول دن یئنه انعام اولدو.
دئدیم: ای شوخ، اولوب عید، اؤپوم قوی الوی،
عیده بوس ائله مک سنت اسلام اولدو.
گولدو اول سیم بدن، سؤیله دی، ای عاشیق زار،
سنی رسوا ائله ین بو طمع خان اولدو.
دئدیم: ای مُشک خط، ائتدین نه اوچون مندن رم؟
دئدی کیم آهوی وحشینی گؤروب رام اولدو.
یاردن عاشیق شیدایه تمنا نه اوچون؟
بو تمنا سانه، ای عاشیق شیدا، نه اوچون؟
شعرا ایچره سنین شهرت ائدن نامین یوخ،
یار اوچون بزم صفا ایچره سرانجامین یوخ.
اؤزگه‌لر کیمی سنین یوخدو وصاقین، بزمین،
مزه و نقل و کباب و مئی گولفامین یوخ.
سؤیل ییرسن اؤزونو جامدن آرتیق، اما،
مئی گولفام ایله مملو اولان جامین یوخ.
چشم بادامیما حسرتله باخرسان هردم،
بئله ظاهر کی، سنین شکّر و بادامین یوخ.
یوخ دل آرام سنه شهرده مندن اؤزگه،
گؤرمه ین گون بو رخ شمعیمی آرای نین یوخ.
سر کوییمده یاتان صبحه کیمی بیر ایتجن،
اعتبارین، شرفین، عزت و اکرامین یوخ.
روزگارین ائله‌ییب تیره بو زلفوم تاری،
تاری شاهدی کی، بیر خوش کئچن ایامین یوخ.
قویموسان دهرده سن بولبول شیدا آدوی،
بزمده من کیمی بیر یار گول اندامین یوخ.
غنچه کیمی جیرین، گئت دخی، سن قان ائله مه،
من کیمی بیر گول اوچون ناله و افغان ائله مه.
دئدیم: ای شمع، سنین حسنوه پروانه منم،
ائیله ین عشقده بو یانماغا پروا نه منم.
کاکیلین تاری منیم بوینوما ورموش زنجیر،
باغلانیب سلسلۀ زلفده دیوانه منم.
خالوون دانه سینه جنّتی وئرسم نه عجب،
آدمین زوریتییم، طالب اول دانه منم.
توتما، ای گوهر یک دانه، بئله خوار منی،
مخزن مرفعتم، گوهر شاهانه منم.
ائتمیشم هر نه جفا ائیله سن، ای شوخ، قبول،
جان وئرن رغبت ایله سن کیمی جانانه منم،
سالمیشام بوینوما زنّار سر زلفوو من،
درد عشق ایله دؤنن دهرده صنعانه منم.
گئجه‌لر یاد روخو زلفون ایله صبحه کیمی،
سؤیله ین سوز ایله، ای شمع روخ، افسانه منم.
کیمسه بیلمزدی سنی عشق ایله انگشت نما،
ای ائدن، قاشی هلالیم، سنی دوردانه منم.
ائتمیسن حسن ایله بو عالمه شهرت مندن،
یئری واردیر ائده سن آخر نفرت مندن.
غنچه وقتی، بو یقین دیر، گول اولور خارایله،
او زامان کیم آچیلار، یار اولور اغیارایله.
باغبان زحمت ایله گولبونی بس لر دایم،
آچیلیب همدم اولور گول، ولی، عطارایله.
تربیت لطف ایله دریاده ائدر دُرّ و صدف،
چیخیبان همدم اولور شاه جاهاندارایله.
چوخدا، ای روح روان، حسنوه مغرور اولما،
قالماسان گول کیمی بو چهره وی رخسارایله!
تا گلر خط، دوشرسن او لطافتیدن سن،
باغ حسنون دولاجاق دیر خس ایله، خارایله.
ظلمت خطین اولور ماه منیر اوسته حجاب،
قالیسان عالم آرا درد شب تارایله.
سونرا چوخ آختاریرسان حسنوی، هم عشاقی،
آلماق اولماز اونو یوز درهم و دینارایله.
مشتری قحط اولو اول ایکی عقیق طبعینه،
قالماسین گرم لطافتیده بو بازارایله.
سنه اوندان سونرا بیر کیمسه خریدار اولماز،
دخی بو رونق رخسار، بو بازار اولماز.
بو قدر تنگه گتیرمه منی، ای غنچه دهان!
چونکی من ایسته میرم فاش اولا اسرار نهان،
بیلسه احوالیمی اول منبع افضال و سخا،
منیم احوال پریشانیما ائیلر سامان.
اول سخا کانی کی، عالمده اونون فیضیندن
شاد و خرمدو هامی مردم شهر شیروان.
سیّده، عالیمه، هر نوع فقیره هر ایل،
ال توتار، سیم وئرر، لطف ایله ائیلر احسان.
گئتمه‌ییب مکه یه بیر کیمسه اونون تک گئتمز،
خلقی سیراب ائله‌ییب، دولت ایله اولدو روان.
ائدر انعام منه، خاطریمی شاد ائیلر.
تاپیلیر جامده مئی، ائوده داخی سفره ده نان.
گلوسن اوندا وصاقیمه منیم عزت ایله،
گؤره جکسن کی، اولور نقل و مزه زینت خاتی.
حق اونو شاد ائله سین کی، منی چوخ شاد ائله‌ییب،
نظر مرحمتی سیّده وار بی پایان.
صادقین تویونو ائتسین اونا الله نصیب،
شاد اولاق، عیش قیلاق بر بط و تار و خوشخوان.
دشمن بختی گؤروب دولتینی خوار اولسون،
ای خدا حاسدی نین منزلی اولسون نیران.
حضرت خیضر کیمی عمر ائله سین عالمده،
استکانیندا اولا چایی زولال حیوان.
گؤرمه سین گولشن اقبالی خزاندان خللی،
بحق سیّد سجاد حسین ابن علی.
سیّدا، چونکی بو ترجو سن ائتدین تحریر،
قیل خیابان بهشتی کیم هر یان تسطیر.
گؤندریب شعروی قیل حاجی رضادن خواهش،
خدمت حاجی احده ائده آنی تقریر.
چونکی وار اوندا فصاحت، اوخور اشعاری گؤزل،
پاک دل، پاک گوهردیر اؤزو بیر پاک ضمیر.
وار امیدیم کی، احد پاکه خداوند احد،
دولت ایله وئره ابنای زاماندان طوفیر.
روز ازّلده اونون طینتینی دست قضا
آب الطاف سخا ایله ائدیب دیر تخمیر.
اونا یوخ لطف و عطا، جود و سخاوتده شبیه،
اونا یوخ فیض و سخا، بذل و عنایتده نظیر.
نئجه کی، سیّد شهر شعرای شیروان،
او صفت حاجی احد اولدو سخاوتده شهیر.
بیلمیرم نسل حسینه ائده جک
حاجی عطا، مانع خیر اگر اولماسا بیر شمر شریر.
سیّدا، ختم کلام ائیله کی، گلدی بو ندا؛
“لعنت الله علی مانع خیراً ابدا*
————————————————-
* خیره مانع اولانلارا آللاهین ابدی لعنتی اولسون.