مختصر، عاشیق اولان دهرده یئتمز کامه

هر کیمی بیز کی، محبتده گرفتار ائدریک،
باغلاریق زلفه، گونون محنت ایله تار ائدریک.
نرگس مستیمیزه کیمسه کی، اولسا عاشیق،
وئرمریک شربت وصلی، اونو بیمار ائدریک.
گول رخساریمیزا کیمسه کی، اولسا طالب،
آچماریق اوز اونا، البته اونو خوار ائدریک.
گؤرمز عالمده بیزیم پرتو رخساریمیزی،
بیز اوزو شمع شب مجلس اغیار ائدریک.
آللیق الدن بیزه عاشیق اولانین ایمانین،
باغلاییب زلفوموزو بوینونا زنّار ائدریک.
آلاریق کؤنلونو بازیچۀ عشق ایله اونون،
توتوبان ایسته سه بیزدن اونو، انکار ائدریک.
مختصر، عاشیق اولان دهرده یئتمز کامه،
بس گرک صبر ائله یه درد و غم ایامه.