بیر نفسجیک سؤیلیییم

بیر نفسجیک سؤیلیییم،
دینلمزسن، نئیلیییم؟
عشق دریاسین بویلایاییم،
عمّانا دالماغا گلدیم.

عشق خرمنین‌ده سوورولدوم،
هم الندیم، هم یوغرولدوم،
قازانا گیردیم، قوورولدوم،
میدانا یئنمگه گلدیم.

من حاقا اولدوم آشینا،
قالمادی کؤنلوم‌ده نسنه،
پروانیم آتاشینا،
شمعینه یانماغا گلدیم.

شاه ختایی‌دیر اؤزوم‌ده،
هئچ خلاف یوخ‌دور سؤزوم‌ده،
اسکیک‌لیک کندی اؤزوم‌ده،
دارینا دورماغا گلدیم.