آرازیم

باخ، آرازیم، بو وحشته، بو دهشته شاهید اول
آزادلیغا شهیدلرین اۆزریندن گئدیر یول.
بیز ایکی قان قارداشی‌نین آراسیندان آخیرسان،
اوزون ایللر بیر ساغالماز یاراسیندان آخیرسان.

هئی آخیرسان، بیزیم اولو بابالارین یاشیندان،
تاریخ بیلیر نه توفانلار گلیب، کئچیب باشیندان.
سنسن منیم قانا دؤنموش اۆرگیمین آیناسی،
دئییرم کی، کۆله دؤنسون بو کؤله‌لیک دۆنیاسی

آل قوینونا دوستلارینی، ای باغری قان آرازیم،
منیم قانلی گؤز یاشیمدان یارانمیسان، آرازیم!
اود سالماق‌چین او تایداکی جلّادلارین جانینا
سینه‌ن اۆستدن یول وئر، کئچیم قارداشیمین یانینا!