اؤترگی سانمایین شیکایتیمی،
منیم هر فریادیم، هر نالم حاقدیر.
دوغما جنوبومدان صحبت دۆشنده
هر کلمم، هر جملهم بیر یانار داغدیر.
اوردا جزاسی وار دیلکلرین ده،
خمیری قانلیدیر چؤرکلرین ده.
سؤزو دوغرولارین کۆرکلرینده
شاللاقلارین یئری زولاق-زولاقدیر.
اۆرک نئجه دؤزسون بو آجی درده،
گؤزلری قاپاییب مین قارا پرده.
شاعرلر وطنی آدلانان یئرده
اعداملی جسدلر قالاق-قالاقدیر.
آی ائللر، غم یۆکلو سؤزومه باخین،
مندهکی بو آغیر دؤزومه باخین،
دئییرم بیر داها اؤزومه باخین:
باغریمدا یارالار یاماق-یاماقدیر.
هیجرانلا دؤیوشور قلم اۆز-اۆزه،
وصالسا هلهلیک گؤرونمور گؤزه.
او تایین دردیندن دئیهجک سیزه
دوستلار، نه قدر کی، سلیمان ساغدیر.