سئوگیلیم، حیاتلا ویداع چاغیمدا
بورجونو یئرینه یئتیرمگه گل.
گل، اؤتن گۆنلرین خاطیراتینی،
گلیشینله جانا گتیرمگه گل!
گل، باشیبلالی تبریزدن دانیش،
اۆرگی یارالی تبریزدن دانیش،
سنگرلی، قالالی تبریزدن دانیش،
وۆصال چیچکلری بیتیرمگه گل.
اوزاقدا اولسان دا یانیمدان منیم،
قانین آیری دئییل قانیمدان منیم،
جانیما یاخینسان جانیمدان منیم –
اؤلسم، منی یئردن گؤتورمگه گل.
عؤمرومون دۆننده قالدی باهاری.
منیم خوش گۆنومده گلمهدین، باری
قؽریب مفتیللری، اودوب یوللاری،
منی سون منزیله اؤتورمگه گل!