عزیزیم آلا داغا،
گۆن دۆشور آلا داغا.
من قاراداغ اهلی‌یم،
یاز منی قاراداغا.
یاغی گلدی یانیما،
سۇسامیشدی قانیما.
دؤندوم غۆربت ائللردن،
قوّت گلدی جانیما.
زحمتیم گئتدی بادا،
ائل گلدی چاتدی دادا.
یارین گؤزو یوْلدادی،
حسرتدی اوْردوبادا.
سؤزوم دۆشر داستانا،
بیر اۆن سالار هر یانا.
غۆربت قوْی سیزه قالسین،
من گئدیرم شیروانا.
بو قالا داشدی قالا،
چؽنقیللی، داشدی قالا.
قوْرخورام غریب اؤله‌م،
یار گؤزو یاشدی قالا.
داغ باشیندا مینارا،
شوْخو دۆشوب چینارا.
قیسمتیم غۆربت اوْلدو،
سن باشینا قؽل چارا.
گل منی فاغیر آغلا،
کیمسم یوْخ، ساغیر آغلا.
چؽخ داغلارین باشینا،
آدیمی چاغیر، آغلا!
ایرفه دۆزدوم کاسا،
کیم ائندیره، کیم آسا.
سن اوْردا شادلیق ائیله،
من بۇردا باتیم یاسا.