گلیب دوشر یئرینه!

ا گر من اولسام، او گیسویِ مشکِ تر یئرینه
اوُپوپ، قوُجوب، سالاردیم او شوخون هر یئرینه
شکر نه دیر کی، حسرتین چکم سنسیز
منه کفایت ائدر لبلرین شکر یئرینه؟!
قیزیل، گوموشسوز هانی منده اؤیله طالع کی
قوجاقلایایدیم او نازک بئلین کمر یئرینه؟!
کؤنولده غمزن اوخو، اؤلمه دیم، دئییلر بس
ساغالماز، هر کیمین اوخ دگسه گرسه ور یئرینه
خیالِ زولفِ روخونله کئچر گئجه م، گونوزوم
بیریسی شامه برابر، بیری سحر یئرینه
فلک، حقیر ائله ین کسلرین مرادینه یئت!
بو مرحمت، گون اولورکی، گلیب دوشر یئرینه
او شوخِ مهوشی طاووسا بنزه دیر کؤنلوم
اوزونده طرهٔ مشکینی بال و پر یئرینه
جاهاندا هر کسین اؤز قیبله گاهی، مکه سی وار
منیم ده قیبله م اوزون، خاللارین حجر یئرینه
بو سرو بویلولارین، واحد، هر غمین چکدیم
همیشه گؤز یاشی وئردی منه ثمر یئرینه