یارالیدیر کؤنلوم!

او قارا زولفون الیندن بلالی دیر کؤنلوم
باتیب غمه، ائله بیل کی، غزالی دیر کؤنلوم
بو عشق عالمینین بیلمیرم نه دیر سیرّی
اسیرِ عشق اولالی لاابالی دیر کؤنلوم
گؤرن ده سئوگیلی سین غنچه گول کیمی قیزاریر
ادبلی بیر قیزا بنزه ر، حیالی دیر کؤنلوم
اؤلونجه چکمز الین نازنین نیگاریندان
رقیبه هرگز اینانماز، وفالی دیر کؤنلوم
فلک اوظلمو منه ائتمه‌ییب، رقیب ائتدی
یازیلسا درد و غمیم، ماجرالی دیر کؤنلوم
شکسته نئی کیمی یاریندان آیریلان گوندن
نوایه همدم اولوب، سان یارالی دیر کؤنلوم
منیم ده دردیمی، واحد، دئمزسن اول شوخه
دئینده قانه دؤنر، ادعالی دیر کؤنلوم