ناز ائدیرم!

او گول کی ناز قیلاردی منِ پریشانه
من ایندی ناز ائدیرم اول گول اوزلو جانانه
بو عشق عالمینی. عشقه دوشمه ین بیلمز
بیلرمی، یانماسا شمعین شرفنی پروانه؟
منی اسیر ائله‌میشدی او شوخ لیلی وشم
دؤنوب او ایندی اولوب عشقیم ایله دیوانه
وفاسیز اولماغینی بوندان اول گولون بیلیرم
عزیز اولوب اونا مندن، نه دنسه، بیگانه
نه ائیله طالیبم اول دلبرین وصالینا من
کی، صبر ائدیم، دؤزوم، البته، دردِ هیجرانه
نه یوسیفم، نه ده کی، سئودیگیم زولیخادیر
اسیر ائدیب منی سالسین ستمله زندانه
جهاندا بسدی منه، واحدم، بیر اؤز یاریم
بهشت ایچینده گؤزوم یوخدور حور و قیلمانه