مهربان اولان گئجه دیر

او گول منه بو گئجه همزبان اولان گئجه دیر
دئییب، گولوب، دانیشیب مهربان اولان کئجه دیر
وفا صحیفه سینی شرح ائدم گرک او گوله
حقیقی عشقیمیزه امتحان اولان گئجه دیر
او سرو بویلو سحر سئیر لاله زار ائده جک
چمن چیچک لرینین باغری قان اولان گئجه دیر
خصوصی عطر آلاجاق اؤز گولوندن هر بولبول
خدنگِ نازه کؤنوللر نشان اولان گئجه دیر
بو خوش دقیقه لری، ای کؤنول، غنیمت بیل
بلا اسیلری شادمان اولان گئجه دیر
رقیب ائشیتسه، نیگاریم منیمله همدم اولوب
حسدله عؤمرو بو غمدن خزان اولان گئجه دیر
گول ایسه پردهٔ عصمتدن آشکار اولاجاق
وصاله یئتمگه بولبول نهان اولان گئجه دیر
اینانما، ال چکه بولبول گولون کناریندان
سئویملی دلبرینه پاسبان اولان گئجه دیر
گول اوزلولر سنی، واحد، یئنه احاطه ائدیب
تفاخر ائیه کی، بختین جاوان اولان گئجه دیر