منو
پرستارین اولاردیم!
اولسایدی میسّر، گؤزلیم، یارین اولاردیم
هر لحظه غمین چکمگه غمخوارین اولاردیم
هر شب دولاشیب صبحه کیمی شمعِ جمالین
پروانه کیمی، طالبِ دیدارین اولاردیم
ممکن کی دئییل بیرده گزیم گلشنِ کویون
ممکن گر اولایدی، یئنه زوّارین اولاردیم
ای طوطی وشیم، آیئنهٔ حُسنونو گؤرجک
آلودهٔ اول لعلِ شکر بارین اولاردیم
مجنون کیمی دایم، سر کویوندا گزه ردیم
عؤمروم نقدر وارسا، پرستارین اولاردیم
یوسیف کیمی وئرسه یدیله دیندارینا قیمت
جان نقدی ایله من ده خریدارین اولاردیم
واحد، سرِ کویوندا گزه ردیم گئجه ـ گوندوز
ای مه، بو ادا ایله دل افکارین اولاردیم