بیرگون اولور یاتانلاردا اویانار

گئجه تا صوبح آچیلینجاخ مله‌دیم بولمدیز هئچ
اورگین قانینی گوزدن الدیم بولمدیز هئچ

گون چیخان واخدا ییغیشدیز بیر آغاج کولگه سینه
اویدوز اوّلده اورکدن قارا بایقوش سسینه

اویانان اولمادی بیر کیمسه آغاج شیهه سینه
نه یوخو؟ لئش لئشین اوسته قالادیم بیلمدیز هئچ
قوللاریزدان یاپیشیب سیلکلدیم بولمدیز هئچ

اوزگه بیر ائلجه بولنلر کوکوزی قازدیردی
سئچدی املیکلریزی آیری یولا ازدیردی

اؤز دیلینده سیزه اؤز ایسته دیگین یازدیردی
آغلادیم من اؤزوزه یاش چیله‌دیم بولمدیز هئچ
قوللاریزدان یاپیشیب سیلکلدیم بولمدیز هئچ

سارالیب سولدولا سینه مده بوتون آرزولاریم
بارماغیم دویدو دیلیم سوسدو دیله گلدی تاریم

قیشقیران بیر منیدیم بیرده منیم یازقیلاریم
من چیغیردیم اؤزوزه یاش چیلدیم بولمدیز هئچ
قوللاریزدان یاپیشیب سیلکلدیم بولمدیز هئچ

ایندی دای کند داغیلیب باغ پوزولان واخدی اویان
گوزله ییردیم بو مین ایللیگ یوخودان بلکه دویان

زنجان آدین قیزیل آذر ائلینین اوسته قویان
یوخودایدیز سیزی آچدیم بلدیم بولمدیز هئچ
قوللاریزدان یاپیشیب سیلکلدیم بولمدیز هئچ

آیری بیر کوکده بیتن گوننن اصالت چورودو
ایندی ساتقینلاریمیز هر کوچه ده مین سورودو

دیلیمیز اولدی یاساق اولکه نی نیسگیل بورودو
صور اسرافیلی مین یول پولدیم بولمدیز هئچ
قوللاریزدان یاپیشیب سیلکلدیم بولمدیز هئچ