الهی، سنی آند وئریروخ صدرینین صداقتینه، کره یاغینین کرامتینه، جمیع علی شیعهسین آخیرچرشنبه گئجهسی حالوانین قبرینه زوّار ائله! الهی، سنی آند وئریروخ پلووون زۆلفی-پریشانینا، سن بیزیم الیمیزی خوروشون دامنیندن کم و کوتاه ائلهمه. یا غفّار، خودایا--خوداوندا، سنی آند وئریروخ پۆستهنین دهانی-تنگینه، خورمانین رنگینه، بیز اهلی-شبوستری مۆبارک یئددی لؤوونون شفاعتیندن محروم و بینصیب ائلهمه. الهی، سنی آند وئریروخ آبدوق ایله قندابین پیلوو دؤورهسینین اطرافیندا چکدیگی زحمته، او گئجه بیزیم عؤورته بیر هوش و باش کرامت ائله، یاغ-دۆیونو خراب ائدیب، اووقاتیمی تلخ ائتمهسین، اوشاغی آغلایا-آغلایا قویوب، قونشویا چوبوق چکمهیه گئتمهسین.
ائی آخیرچرشنبه گئجهسی یاتیب، سحر تئزدن قوشلار زیارتینه گئدن خانیملار، "آمین" دئیین! ائی چئهیل-یاسین سویو کیمی گندوو سویونو ایستئعمال ائدیب، مرامینه نایل اولانلار، اوجادان "آمین" دئیین. خودایا-پروردیگارا، سنی آند وئریروخ کۆچهلریمیزین زؽغینا، حاماملاریمیزین کثافتینه، جاوانلاریمیزین بؽغینا، سن بو یالانچی مۆسلمانلارین ایمانینی کامیل ائله. ائی اون تۆمنه یۆز تۆمن مۆعامیله آلانلار، ائی ائوینی، باغینی گیروو قویانلار، "آمین" دئیین!
الهی، سنی آند وئریروخ دؤولتلیلریمیزین توخلوغونا و فۆقرالاریمیزین چوخلوغونا، خیروو سویونون یوخلوغونا، یا بیزی اؤلدور، طلبکارین یاخاسین قورتار، یا طلبکاری اؤلدور، بیزیم یاخامیز خیلاص اولسون. ائی آرپا چؤرهیینی بیری بیرینین الیندن قاپانلار، ائی سویوق یارما آشینا حسرت قالانلار، "آمین" دئیین!
الهی! سنی آند وئریروخ تۆمنی اون شاهییا حؤجّت یازان مولّالارین قلم-داواتینا، ایستامبولچولارین باراتینا، تیفلیسچیلرین ماناتینا، بو نذیر صاحیبینین امواتینا، آخیرتده "نئینیم!" گۆنو گؤرستمه. ائی بیر کاغیذ لیره وئریب، بیر جۆت جوراب آلیب آیاغینا سوخانلار، یاتمیسیز، یا بنگ آتمیسیز؟ اوجادان "آمین" دئیین!
ائی نذیر صاحیبی، الله گؤروم سنین پوللارینی فالچییا، ایلانچییا قیسمت ائلهمهسین. ائی باجیلار، الله فالچیلاری سیزه و سیزی فالچیلارا چوخ گؤرمهسین! اوجادان "آمین" دئیین! جناب حاجی، الله نذرووو قبول ائلهسین. سنین کی، الیندن سو سووارماق و جنازهیه یاپیشماق و خئیره-شره ایشلهمک گلمز، بس الله یانیندا ایلشن کاسیبین عؤمرونه برکت عطا ائلهسین، سنه ده بیر اؤلوم وئرسین، تا بئش-اون کاسیب فؤوتوندن خئییر گؤرسون.
ائی دؤولتلیلرین خئیراتیندا آشاغی باشدا ایلشیب، دویون-قارین پیلوو یئینلر، اوجادان "آمین" دئیین! ائی مولّا قورخوسوندان ساققال قویوب، باش قؽرخدیرانلار، "آمین" دئیین!" ائی ایستامبولچو قارداش، نه یاپدین گلدین وطنه، اؤلدون اتنه، اگر ننن جاریدی، سنین عؤمرون یاریدی. ائی جمیع علی شیعهسینی موردار و اؤزونو پاک بیلن جاری، اؤلدورسون سنی تاری! "آمین" دئیین!
خودایا-خوداوندا، باری پروردیگارا، بیر سؤز دئیهجگم، آجیغین گلمهسین، اولا کی، یادیندان چؽخا، سن بو نذیر صاحیبینین قدیم اؤلنلرینه و جدید اؤلنلرینه رحمت ائله. علیالخوصوص ایکی یۆز دوخسان دوققوز ایل بوندان قاباخ، آخشاما اۆچ ساعت قالاندا، قایناناسی تۆکزبان خالا کی، باش تیرهیی-خاکه چکیب، اونا رحمت ائله و اوندان یاخشی مۆتوجّیه اول. جان سنین، جان تۆکزبان خالانین. "آمین" دئین، لال اولمایاسان! الهی، سنی آند وئریروخ بو نذیر صاحیبینین بوردوغو گۆلهلره و چؽخارتدیغی لۆلهلره، اوّلا جمیع باغ صاحیبلرینی بونون شرّیندن مۆحافیظت ائله و ثانیاً حلال کسبینه برکت عطا ائله. ائی باغینا هر هفته قاپی آلانلار، ائی آلتی آی زحمت چکیب، حاصیلده الی بند اولمایانلار، "آمین" دئیین! آمین یئددی پئیغمبرین آدیدیر! اوجادان آمین دئیین.
الهی، سنی آند وئریروخ گیردکانین گیردهلیگینه، فؽندیغین خؽردالیغینا، سیسبگین قبریستانلیغینا زیبیل تؤکنلرین باشینی قویوب آیاغینا داش وورما. ائی ایدهنی یئییب، چردهیینی حصیر آلتینا سوخانلار، ائی بورنونو اتگی ایلن سیلنلر، ائی پؽرپیسلی دونبالانلار، مباده اللهین بئیتینده سیزدن بیر حادثیه بیروزه گله هر ایکی دۆنیادا روسیاه اولارسیز. قالخین، اوجادان "آمین" دئیین.
به، به، طاغدان دا بیر نذیر وئردیلر! ائی باجی، بیلمیرم مۆسلمانسان، یا کافیرسن؟ بوینووا قؽزیل تاخیرسان، نامحرمه باخیرسان! الهی، آند وئریروخ اوجو بونوغون قدّینه، وتّضالینین مدّینه، بو عؤورتین جدّینه، جنّاتی-عدنده یئر کرامت ائله. اوجادان "آمین" دئینلرله برابر.
الهی سنی آند وئریروخ ریانین مۆباحلیغینا، قوماربازلارین ساغلیغینا، فیرعونون اللهلیغینا، کربلایی حسینقولونون جرّاحلیغینا، بو نذیر صاحیبینی عصرین عزرائیل حکیملرینه و ایدارهلرینه مؤحتاج ائلهمه. ائی اوجادان "آمین" دئین، سنی گؤروم، وایقانلی زۆلفعلینین سۆتونه راست گلهسن!....
به، به، اوستا عباسقولو دا بیزه بیر نذیر گؤندردی. اوشاخ، اوجادان "آمین" دئیین. خودایا-پروردیگارا، سنی آند وئریروخ مشدی لۆطفعلینین ایشتاهاسینین آزلیغینا، هیروو جعفرین کئفینین سازلیغینا، کربلایی حسنعلینین گؤزلویونه، آغا میرزه ممّدعلی آغانین سۆخنورلیگینه، بیره یۆز مین بو دۆنیادا، بیره یۆز مین آخیرتده اجیر و عوض کرامت ائله. ائی باشینی اوستا عباسقولویا قؽرخدیریب پول وئرمهینلر، اوجادان "آمین" دئیین. الهی، سنی آند وئریروخ گۆلشنین دووارلارینا و ایمامزادهنین داغیلان تیفاغینا، سن بو نذیر صاحیبینی سولطان بابانین قبرینه زوّار ائله. ائی بو نذیر صاحیبی! گئت، بو درهکوچهسیندهکی پیر مطلبین وئرسین، حۆسینبابا کمرین باغلاسین، قؽشین تۆتهتوت واختیندا مسجیدین مینارهسینده اذان دئیهسن. ائی ایمامزاده قاپیسینا قندیل باغلایان باجیلار، اوجادان "آمین" دئیین. الهی، سنی آند وئریروخ مولّا ممّدعلی (مولّا مندلی) آخوندون قبرینه، پادیشاهی-ایسلامین تیغی-بیدریغینی ادایه قاطع و بۆررا ائله. بو مسجیدین بانیلرینین اؤلنلرینه رحمت، قالانلارینا توفیقین کرامت ائله. اوجادان "آمین" دئیین. الهی، بو عمی کی، آدینی تانیمیرام، منه پول عطا ائلهدی، ائی عمی، الله قادانی-بالانی، عقربی-ایلانی، مامیلی-ماتانی، یانوندا یاتانی، رحمتلیک آتانی، یئرین، گؤیون بلیاتیندان محفوظ ائلهسین!....