سنین او گۆل اۆزونه من گۆلاب اولایدیم، کاش!
ایاقینا، بالا، بیر جۆت جوراب اولایدیم، کاش!
کیتاب ایله دانیشیرسان، دانیشمیسان من ایله،
گئجه الینده سنین من کیتاب اولایدیم، کاش!
گۆنش سنی گؤرر هر گۆن، ولئیک من محروم،
چوخ آریزو ائدیرم آفیتاب اولایدیم، کاش!
گلممیرم اورا چوخدور کیرایهیی-بالون،
الهی، من قجهله، یا غۆراب اولایدیم، کاش!
شراب ایلن گۆنو خوشدو، منیمله یوخ آراسی،
او بیوفانین الینده شراب اولایدیم، کاش!
اوتانیرام کی، دئیم یوللا بندهیه بیر ماچ،
ندیر بو شرم و حیا، بیحیجاب اولایدیم، کاش!
رقیب قویمورو، من کامی-دیل آلیم سندن،
رقیب چئشمینه تیری-شهاب اولایدیم، کاش!
دۆنن بیری دئدی: واعیظ گئدیر بئهیشته طرف،
دئدیم کی، من ده بیر اهلی-عذاب اولایدیم، کاش!
یوخودا مؤعجوزه بیر ساعتی-طلا وئردین،
گۆلوم، سنین کیمی عالیجناب اولایدیم، کاش!