عزم کنج ائت کیم، هوانین اعتدالی قالمادی

جانیمین جسمیله ذوق اتصالی قالمادی،
آه کیم، سنسیز دیریلمک احتمالی قالمادی.
شکرلله، بخت یار اولدی، یئتیردیم تیغینه،
باشیمین بیر قیلجا بوینومدا وبالی قالمادی.
ایستدیم اول ماهه عرض حال ائدیم، حیرت منه
اؤیله قالیب اولدی کیم، بیر سؤز مجالی قالمادی.
بیلمزم خالین خیالین خاندا تصویر ایلییم،
داغدن بیر یئر تن و جانیمدا خالی قالمادی.
هر کیمی گؤردونسه غم افتاده سی، توتدون الین،
وه کی، مندن غیری بیر غم پایمالی قالمادی.
ای خوش اول سرمست کیم، کؤنلونده شوقو ذوق دن
آخرت اندیشه سی، دنیا وبالی قالمادی.
آفرین، ای جام، کیم، سیلدین کؤنول آینه سین،
خاطر پاکیمده دنیانین ملالی قالمادی.
درد نسبت، پایمال قیددیر هر کیم کی، وار،
بزم دهر ایچره حریف لا ابالی قالمادی.
گؤر، فضولی، عشق طغیانین، عدم ملکون گؤزت،
عزم کنج ائت کیم، هوانین اعتدالی قالمادی.