جهنم قاپی سین آچدیرما، واعظدن خبر سورما!

کؤنول، تا وار الینده مئی، تسبیحه ال اورما،
نماز اهلینه اویما، اونلارایله دورما، اوتورما!
اگیلیب سجده یه، سالما فراغت تاجینی باشدان،
وزودن سو سپیب، راحت یوخوسون گؤزدن اوچورما!
ساقین، پامال اولورسان بوریا تک، مسجده گیرمه
و گر ناچار گیرسن، اوندا منبر کیمی چوخ دورما!
مؤذن ناله سین آلما قولاغه، دوشمه تشویشه،
جهنم قاپی سین آچدیرما، واعظدن خبر سورما!
جماعت ازدحامی مسجده سالمیش کدورت لر،
کدورت اوزره، لطف ائت، بیر کدورت سن هم آرتورما!
خطیبین سانما صادق مسجدین، قولیله فعل ائتمه،
ایمامین سانما عاقل، اختیارین اونا تاپشورما.
فضولی، بهره وئرمز طاعت ناقص، ندیر جهدین،
کرم قیل، زرقی طاعت صورتینده حددن آشورما!