درد ایلن عاشق کیمی قانلار تؤکن گؤزدن مدام

ای مصفا شیشۀ جؤولانی فیروزه فام،
معدن یاقوت صهبا، گولبون گولبرگ جام!
غنچۀ گولزار حکمت، حقۀ شهد صفا،
درج دُرّ معرفت، معیار ادراک تمام.
پرده دار دختر راز، دایۀ بنت العنب،
محرم سلطان مئی، مطبوع ابنای کرام
ال دوتوب، دوشموشلری بیر- بیر ایاغه دورقووزوب،
صرف ائدن وارین کؤنوللر آچماغا هر صبح و شام.
نازنین دلبر کیمی احبابه قانلار یوددوران،
درد ایلن عاشق کیمی قانلار تؤکن گؤزدن مدام.
وه، نه جوهرسن کی، بیلمز هیچ کیم خاصیتین،
عجز اوصافیندا دیر تقصیره قابل عقل تام.
گه گولوب قه – قه، تر ائیلرسن دماغین مجلسین،
گه اگیلیب خلقه عذر ایله قیلیرسان احترام.
نه دعا دیر بیلمزم قولقول دئییب ذکر ائتدیگین
کاول دعانین حؤرمتین واجیب بیلیبدیر خاص و عام.
عقل آلیرسان، جان باغیشلارسان کمال سحر ایله،
دیو سالیرسان شیشه یه، اودو قیلیرسان سویا رام.
گاه دورماق، گاه اگیلمک، گه ایاغه دوشمگین،
ظاهر ائیلر گه سوجود و گه رکوع و گه سجود و قیام.
بیر ریایی زاهیده بنزر سولوکین کیم، اولا
دیشراسی تقوا ایلن زیبا، ایچی دولو حرام.
یوخ، یوخ، اطوارین منزه دیر ریا دن، شبهه سیز،
سنده مضمردیر خواص شربت یحیی العظام.
قیلماسینلار طعنه، گر میخانه‌لر سیر ائیله سن،
صوفی صافی درونسان، زائر بیت الحرام.
الامانت، ای چراغ اهل قدر و اعتبار،
المروت، ای نظام اهل اعز و احتشام.
چون صفای نیتین توفیق حسن سیرتین،
قیلدی قربیلن سنی بی خدمتینده شادکام.
اومدوغون سرمنزل مقصودونا باسدین قدم،
کیمسه محروم اولمایان درگاهده دوتدون مقام.
خاطرین دن چیخماسین محروم اولان اوفتاده لر،
تانریچون یادیندا توت گر دوشسه تقریب کلام،
عرضه قیل مندن دعا اول معدن انصافه کیم،
فیض عدلیله پریشان ملک تاپمیش دیر نظام.
حارس معمورۀ بغداد، قطب اهل روم،
حامی ملک حما، مستحفظ سرحد شام،
ویس بی حضرتلری، خورشید اوج اقتدار،
شهریار نیک رای و نیک بخت و نیکنام.
امر اقبالین مرتب قیلماغا اولموش اونا،
شام بیر هندی کنیزک، صبح بیر رومی غلام.
اول بیری تزیین خلوتگاهینه اقدام ائدیب،
بو بیری ترتیب ایوانینا ائیلر اهتمام.
جامه قیلمیش جم سفارشلر کی، یئتگج بزمینه،
اؤپ الین، اخلاصیمی عرض ائت، یئتیر مندن پیام.
باده یه جمشید امانت یوکله‌میش کیم، تانریچون،
گؤروجک اونو دوش ایاغینه، یئتیر مندن سلام.
ای خرامان سرو کیم، تا دؤوره گلمیشدیر قدح،
گؤرمه‌ییبدیر سن کیمی بیر طرفه سرو خوش خرام.
ساغر خولقون نسیمیندن مصفا دیر دماغ،
بادۀ لطفون شمیمیندن معطردیر مشام.
قاندا کیم، گیردیسه دوشمن کام چیخدی جام مئی،
شکرالله کیم، سنین بزمینده اولدو دوست کام.
اؤزگه‌لر دؤورونده چوخ قان یوددوروبدور ساغره،
دؤور ظالم وئرمه‌ییب ترتیب اولان بزمه دوام.
دؤولت جاوید امدادیله فرصت دیر بو گون،
ساغر استعجال ائدیب دؤوران دان آلسا انتقام.
سرورا، فارغ دئییل سن دن فضولی بیر زمان،
اِنَّهُ مُستَدعی استقبائِکُم بَین الاَنام
اَشرَقَت مِنکَ عَلی الظَّلماءِ اَنوارُ الُهدی
خَلَّدَت آثارُ اَنوارٍ بِها زالَ الظُّلامُ