رنگ زرد و مئی سُرخون گؤرن ائیلر حیرت

بو صُراحی مثلا بیر صنم رعنا دیر
کی، دمادم طرب انگیز و نشاط افزا دیر.
سروتک قامت دلجو ایله عشاق فریب،
شمع تک پرتؤو روخسار ایله بزم آرا دیر.
گولبون باغ طرب، غنچۀ گولزار فرح،
گول کیم اوندان آچیلیر، جام مئی صهبا دیر.
رنگ زرد و مئی سُرخون گؤرن ائیلر حیرت
کی، خزان ایچره اجب بو نه گول حمرا دیر.
گاه هم سلسلۀ عاشق خونین دل اولوب،
بوینو زنجیر جونون قئیدی چکن شیدا دیر.
گاه یوز عاشق شیدایی قیلیب مست و خراب،
ائیله مز هیچ ترحم، ایشی استغنا دیر.
بزم اوچون هر طرفین طرفه ایگیدلر دوتموش،
ساناسان خلعت زربفت ایله بیر میرزا دیر.
باطن صافیله بیر صوفیه بنزر کی، مدام
سجده سینده اثر صدق و صفا پیدا دیر.
کهربایی دون ایلن بیر بت سرکش دیر کیم،
جلوۀ ناز ایله شه مجلسینه زیبا دیر.
اول شهنشاه کی، فیضین دن اومار کام مدام،
بزم وحدتده اگر خضر و، اگر عیسی دیر.
چاکر چاکری فغفور ایله خاقان اولوبان،
بندۀ بنده سی اسکندر ایله دارا دیر.
جم و جمشید دئگیل بزمده همتاسی اونون،
سَرورِ بی بدل و خوسرو بی همتا دیر.
خان عادل هم اونون پرتؤو اقبالین دان
بیر اثر تاپدی کی، صاحب نظر و بینا دیر.
نشئۀ ذؤوق بولان جام رضاسین دان کام،
بزم عشقینده قامی عمر، قدح پیما دیر.
ای فضولی، دون و گون ائیله دعا صدق ایله کیم،
اولا بو دؤولت و اقبال ایله تا دونیا دیر.