اسیر درد اولانلار روزگارین انقلابیندان

فلک هر دؤورده بیر فیض حکمت آشکار ائیلر،
تقالیب زامان، اظهار صنع کردگار ائیلر.
قرادن آغی فرق ائتمز بو رمزین بیلمه ین دهرین
کی، نیچون گه نهاری لیل و گه لیلی نهار ائیلر.
بیاض اوزره سواد نسخه کیم اسرار حکمت دیر،
خرد هر حرفینی منظور عین اعتبار ائیلر.
اسیر درد اولانلار روزگارین انقلابیندان،
اگر صبر ائتیه لر، درمانلارین هم روزگار ائیلر.
فلک دورانی نین احوالینه واقف اولان عارف،
طریق صبر و تسلیم و توکل اختیار ائیلر.
مقارن اولسا آثار سعادت تیره توپراغه،
نسیم نوباهار اول تیره توپراغه گذار ائیلر.
مجلا ائیله‌ییب آینۀ طبعین کدورتدن،
قیلیب خرم، وئریب لطف طبیعت لاله زار ائیلر.
وئریر هر خسته یه البته دوران فلک درمان،
ولی بیر قاچ زامان بیمار دردی انتظار ائیلر.
قیلیر هر نامرادی عاقبت مقصودینه واصل،
ولی بیر نئچه مدت ذل حرمان ایله زار ائیلر.
زمانه هر دیاره ایسته سه آثار امنیت،
اونا صاحب لوا، بیر سرور رأفت شعار ائیلر.
قضا هر کشورین اهلینه جمیعت مراد ائتسه،
اونا البته بیر دانای کامل شهریار ائیلر.
بحمدالله بو گون بو ملکه سالمیش سایه بیر عادل
کیم، اونون نسبتیله عز و رفعت افتخار ائیلر.
سرافرازی کی، فیض خاکبوس آستانیندان
ائنیب هر دم گونش کسب عُلوّ اقتدار ائیلر.
صفای ذکر خاک پاییدیر اول صیقل رحمت
کی، مرآت دل احبابدن رفع غبار ائیلر.
فلک مشاطه سی وئردیکده زیب شاهد دولت،
اونون ماه لوای رأفتین آینه دار ائیلر.
زمانه انقلابیندان فراغت ایسته ین عارف،
اونون معمورۀ اقبالینا حصن حصار ائیلر.
سمی احمد مرسل محمد بی، او دریا دل
کی، عدل خلقه عرض رحمت پروردگار ائیلر.
ایا سردار روشن رأی ملک آرای، فرّخ رخ
کی، هر منصبده اسمین، اقتضای اشتهار ائیلر.
کمال معرفت هر خاندا و هر دورده اولسا،
سنی سردفتر ارباب تمکین و وقار ائیلر.
بو مُلکه سایۀ دولت بوراخمیشسان بحمدالله،
یئریدیر گر سنه ملک اهلی جان نقدین نثار ائیلر.
نئچین کیم ذات پاکین مظهر فیض عدالت دیر،
بو ملکون هر گونون نوروز و هر فصلین باهار ائیلر.
مشاهد رونقینه عزم قیلمیشسان، زهی همت،
بو همتله سنی خلاق عالم کامکار ائیلر.
شهید کربلایه سو یئتیرمک قصدین ائتمیشسن،
سنی البته عالمده بو نیت پایدار ائیلر.
سرافرازا، فضولی خسته یه بو ملک غربتده،
سپهر ناموافق دؤری جور بی شمار ائیلر.
اگرچی بیقرار ائتمیش دیر اول بیچاره یی محنت،
بولوب تمکین سنین ذوق وصالینله قرار ائیلر.
جمیع خلقدن قطع ائیله‌میش سررشتۀ الفت،
اگر سن هم ترحم قیلماسان ترک دیار ائیلر.
سن اول پاکیزه طلعت، آفتاب عالم آراسان
کی، لطفون کؤنلومی یوز مقصده امیدوار ائیلر.
وئریر مدح شریفین جوهر گفتاریمه رونق،
صدف دیر قطرۀ بارانی دُرّ شاهوار ائیلر.
قیلیر شمع جمالین نوری طبع تیرمی روشن،
گونش دیر سنگ بی مقداری لعل آبدار ائیلر.
امیدیم وار کیم، وار اولاسان عالمده قدرایله،
قضا هر نئجه کیم یوخدان جاهان اهلینی وار ائیلر.