غالباً آینۀ طبعی مجلا ائیلر

صبر هر درده مرورایله مداوا ائیلر،
صاحب صبر بولور هر نه تمنا ائیلر.
دؤردن دهرده هر مقصده بیر موعد وار،
وقت سیز گرچی اونا طبع، تقاضا ائیلر.
یئتمه دن وقت، مرادینی تقاضا قیلماز،
هر محق کی، خبیرم دئیو، دعوا ائیلر.
رسم دؤران فلک دیر بو کیم، اهل طلبی
نئچه گون حیرت حرمان ایله ایذا ائیلر.
صورت شاهد اقبالی قبول ائتمک ایچون،
غالباً آینۀ طبعی مجلا ائیلر.
طالبین دؤر سپهرایله مخالف روشی
عقده‌لر رشتۀ احوالینا پیدا ائیلر.
ضایع اولماز، ایریشیر مقصدینه، صبر قیلیب
کیم کی، دهرایله مدارینده مدارا ائیلر.
دؤر بیهوده دئگیل، هر نه مقدر اولسا،
اونا تدریج ایله اسباب، مهیا ائیلر.
هیچ مخلوقدا یوخ قدرت ایجاد امور،
هر نه ائیلر، اثر قدرت مولا ائیلر.
قیلماسا لطف حق و دولت توفیق مدد،
زهری زنبور قاچان شهد مصفا ائیلر.
من کیمی زاره نه نسبت شرف نیل مراد،
لطف حق دیر کی، منی مقصده اهدا ائیلر.
ای کؤنول، کسمه طلب بادیه سیندن قدمین
کی، طلب رتبۀ اقبالی معلا ائیلر.
لیک حال اهلینه اظهار ائده گؤر درد درون،
خسته احوالینی معلوم اطبا ائیلر.
اکمل خلقدن ایسته شرف و رفعت کیم،
قرب ادنا هوسی، رتبۀ ادنا ائیلر.
گرچی صورتده شریک بشریت چوخ اولور،
درک اسرار حقیقت دل دانا ائیلر.
آز اولور قابل ادراک رموز معقول،
سانما هر خاکی قضا عالم اسماء ائیلر.
مستعد شرف رفعت اولان نادیر اولور،
سانما هر آبی هوا، لؤلؤ لالا ائیلر.
چوخ اولور گرچی معادنده جواهر صنفی،
پادشه زیور افسر، دُر یکتا ائیلر.
ساعد عدلده دیر قوت ایجاد نظام،
عرض اعجاز نبوت ید بیضا ائیلر.
پنجۀ عزمده دیر قدرت اصلاح فساد،
سحر دفعین مدح ده معجز موسی ائیلر.
نظم دنیا سبب سلطنت عقبا دیر،
اعدل خلقینی حق ناظم دنیا ائیلر.
آرتیریب صورت حالینه کمال معنی،
صورت و معنی ایله جمله دن اعلا ائیلر.
مجملا حضرت پاشای فلک قدر کیمی،
عالم افروز قیلیر، مملکت آرا ائیلر.
اول ذکی طبع کی، دیوان خلافت حکمون
رُبع مسکونه اونون دقتی اجرا ائیلر.
اول سخاپیشه کی، بیر دمده قیلیر صرف گدا،
هر نه یوز ایلده عیان معدن و دریا ائیلر.
سایۀ رأیت اقبالی یئتن یئرلرده،
روزگارینی عدونین شب یلدا ائیلر.
عرصۀ رزمده هر دم کی، قیلیب میل غزا،
جمله سین عقده گشای صف هیجا ائیلر.
داغیدیر تیغ ایله ترکیب عدو اجزاسین،
لیک هر جزئون اونون لا یتجزا ائیلر.
شب هیجاده کی، سیارۀ پیکانی ایله،
سر خصمینی قضا اوج ثریا ائیلر.
زخم تندن آچوبان روح مخالف روزن،
چیخوب اول اوج ثریایه تماشا ائیلر.
مدد رأی ضمیریله گلور فعله مدام،
لوح قدرتده قضا هر نه کی، انشاء ائیلر.
لفظ پاکیندن ائدر حسن عبارت کسبین،
فُلک احکام قدردن نه کی، املا ائیلر.
عالمی ائیله سه بیر ذات مشخص تقدیر
خاک پایینی اونون دیدۀ بینا ائیلر.
شهرت اسمی یئتر شاهد حسن عملی،
اهل حق اسمدن ادراک مسما ائیلر.
ای کی، اهل نظره ناصیۀ اقبالین
سلطنت نورینی هر لحظه هویدا ائیلر.
سنده دور سنده چو اسرار خلافت گنجی،
اهل ادراکی سئور واقف معنا ائیلر.
ممکن اولماز کی، اولا نظم جهان رأیین سیز،
صورت کَونی قاچان ترک هیولا ائیلر.
روضۀ خاک درین باغ گل جنّت دیر،
کیم کی، جنّت دیلر، اول روضه ده مأوا ائیلر.
متصل گرچی نیاز ایله دوتوب دامانین،
تیغ سندن طلب کثرت اعدا ائیلر.
جلوه گاه عملین مسند امنیت دیر،
اثر رأفتین، اعدایی احبّا ائیلر.
ماری، تهدید عذاب غضبین مور قیلیر،
پشه یی تربیتین عزّ ایله عنقا ائیلر.
اولیا برجونه یئتدی قدمین، شک یوخ کیم،
خاک پاکین دکی امواتینی احیا ائیلر.
ای خوش اول مقبره کیم، بولماغا امواتی حیات،
اونو توفیق گذرگاه مسیحا ائیلر.
سرورا، صامت ایکن لذت مدحین ذوقی
طوطی نطق فضولینی شکرخا ائیلر.
ائیله کیم، فصل خزان بلبلی لال ائتمیش ایکن،
شوق نظارۀ گل ذوق ایله گویا ائیلر.
جان مهجورینه راحت یئتیرر دیدارین
چمن سبز بهاری فرح افزا ائیلر.
زیب مدحیندن آلور لهجۀ ناهمواریم،
خاری مرغوب جمال گل رعنا ائیلر.
گرچی ساخلاردی نهان نظمیمی بخت سیهیم،
سنه یئتدیکجه نه کیم وار ایسه افشا ائیلر.
دوتالیم سرورر اعیانه، حجاب ظلمت،
خضردن آب حیاتی نئجه اخفا ائیلر.
داورا، بؤیله زامانلارداکی عدلین اثری
چارۀ دفع غم هر دلی شیدا ائیلر.
اهل عرفانه کمال کرمین هر ساعت
لطفلر ظاهر ائدیب، میل محابا ائیلر.
نه روا دیر بو کی، پیوسته سپاه غم و درد
کؤنلومین ملکینی بی واسطه یغما ائیلر.
من نهانخانۀ عزلتده ایکن فقر منیم
کشف اسراریم ائدیب عالمه رسوا ائیلر.
هر زامان خلق منه قیلماغا اطلاق جنون،
منی اندوه، سراسیمۀ سئودا ائیلر.
بو بلادن کیمه اظهار شکایت قیلاییم،
هر کیمه ظلم کئچیب دیر، سنه شکوا ائیلر.
واقف سرّ سخن کیمسنه یوخ سندن غیر،
سن اگر ائیله‌مه سن، کیم منه پروا ائیلر؟
وار امیدیم نئجه کیم، مبدع آثار وجود
صرف تقدیر قیلیب خلقت اشیا ائیلر،
اولا باقی اثر معدلتین کیم، دایم
اثر ظلمدن آفاق مبرا ائیلر.