نه مزاجیمده ارتکاب غرور

۵ ٠ من کیمم؟ – بیر فقیر بی سر و پا،
کمترین بنده و کمینه گدا.
سایر کارگاه صبر و سکون،
سالک شاهراه فقر و فنا.
نه مزاجیمده ارتکاب غرور،
نه فعالیمده احتمال ریا.
کنج عزلتده فقر و فاقه ایله
اولموشام اؤیله محو کیم، مثلاً:
مرکز خاکی ائتسه زیر و زبر،
بولاماز گردیمی نسیم صبا.
عزل قیلمیش منی عمل لردن
عامل کارخانۀ دنیا.
قیلمازام کار و بار عالمه میل،
چکمه زم عزل و نصب ایچون غوغا.
منه وئرمیش جاهان قامو فقرین،
نولا ائتسم جاهانا استغنا.
عالم عزلتین یگانه سی یم،
قاف دن قافه یوخ منه همتا.
صورتیم فقر و سیرتیم منعم،
هیأتیم مور و همتیم عنقا.
رفعت قدریم التفات ائتمز،
گر سلیمان قیلیرسا عرض عطا.
فانی مطلقم، قبول ائتمن
منت خضرایله زلال بقا.
دئمزم وحشی یم، طبیعت ایله
طالب ذوق صحبتم، امّا
بیر دیار ایچره یم کی، خلقیندن
ائیله مز هیچ کیم منه پروا.
کیمسه یوخ دردیم ائیله ییم اظهار،
ائیله ییم اوندان التماس دوا.
لعل وش داش ایچینده دیر وطنیم،
گل کیمی، خاری قیلمیشام مأوا.
دون بو حال ایله محو حیرت ایکن،
گلدی بیر قاصد و گتیردی مانا
بیر عجب نامۀ فرح تأثیر،
محض حسن عبارت و املا.
ظاهری دلپزیر و فیض رسان،
باطنی فیض بخش و روح افزا.
نقش خطینده الطف صورت،
طرز لفظینده اشرف معنا.
جلوه گاه نظرده هر لفظی،
بیر پری پیکر و ملک سیما.
عشه و شیوه و کرشمه ایله
دل ائدر صید و عقل ائدر یغما.
فهم قیلدیقدا حسن مضمونون،
قیلدیم اوندا سرورلر پیدا.
بنده یی لطف بیرله یاد ائتمیش
حضرت سیّد خجسته لقا.
اول فلک قدر کیم، اونا وئرمیش
حکمت حق کمال صدق و صفا.
ذات پاکی جمیع عالمدن
شرف رتبه ایله مستثنا.
فیض علمی افادۀ بشری،
اونا ارواح قدس دن القا.
اصلی دیر نور پاک مصطفوی،
حکمودور رونق سریر قضا.
علمی دیر باعث رفاهت خلق،
فعلی دیر موجب رضای خدا.
آز اولور بیر آرادا جمع اولماق
حکم و علم و سیادت و تقوا.
میر سیّد محمدی قاضی،
منبع علم و حلم و جود و سخا.
عَظَّم اللّهُ قَدَرَهَ العالی
رَفَع اللّهُ شأنَهُ الاَعلا
زیَّداللّه عزّ و رَفْعَتَهُ
نفذ اللّه حُکمَهُ اَبدا
ای قضاحکم کیم، میّسردیر
ذاتینه اقتدار عز و علا.
گل گلزار عترت نبوی،
چمن آرای ملت زهرا.
نور چشم تمامی سادات،
مقتدای جمیع اهل ذکا.
منه تقصیر حکمون ائتمیش سن،
دئمک اولماز بو حکمه حکم خطا.
لیک بیر بندۀ حقیرم من،
عملیم اهل خیره خیر دعا.
صاحب عسرتم، منه نه دوشر
کیم، اولام همنیشین اهل غنا؟
محض جهلم، منه نه نسبت دیر
کی، قیلام میل صحبت فضلا؟
گرچی افلاکه رغبت ائیلر خاک،
یئتمز اعلایه رتبۀ ادنا.
لطف سندن منه مناسب ایکن،
مندن ائتمک مطالبه نه روا؟
ای فضولی، بو نو، دعواده،
مصلحت دیر دوتام طریق رضا.
حال مشکل دور اوندا کیم، بیر اولا،
صاحب حکم و صاحب دعوا.
وار امیدیم کی، تا مؤثر اولا،
ثابت و سایر اولا ارض و سما،
اولا حکم قضا ایله باقی
قاضی غازی خجسته لقا.