حکم دور حکم کی، دنیایه وئرر زیب و نظام

صنع حق کیم، یوخ ایکن عالمی ائتمیش پیدا،
اوندان آلمیش اثر نظم ضامن اشیا.
اقتضای نسق مُلک و نظام ملت،
خاص وعامین کیمین اعلا، کیمین ائتمیش ادنا.
تا ضرر یئتمه یه ادنالره اعلالردن،
ائیله‌میش عالمه فرمان خلافت اجرا.
انبیا بیرله سلاتینی مفوّض قیلمیش،
اولماغا نیت عدل ایله ممالکارا.
حکم دور حکم کی، دنیایه وئرر زیب و نظام،
حکم دور حکم کی، دین رسمینی ائیلر احیا.
حکم اگر اولماسا دنیایه سالیر ظلم فساد،
حکم گر اولماسا بولماز نسق ملک بقا.
حاکم اولدیر کی، موافق اولا حکمونه قدر،
حاکم اولدیر کی، مطابق اولا امرینه قضا.
حاکم اولدیر کی، اونون اولمایا ذاتیندا طمع،
حاکم اولدیر کی، اونون اولمایا فعلینده ریا.
شمعدن گؤرسه کی، پروانه یه بیر ظلم یئتر،
کسه باشین، دئمه یه ضایع اولور نفع ضیا.
بولمایان دولت و توفیق و عنایت حق دن،
نه روا کیم، قیلا اجرای حکومت دعوا.
روش عدلده دیر مرتبۀ قرب و قبول،
عدل سیز حاکمه دعوای حکومت نه روا؟
بیر ورع اهلی اگر قیلسا عبادت یوز ایل،
ساعت عدلیجه وئرمز اثر قرب خدا.
حکم دور واسطۀ موت و حیاتی خلقین،
وای اول حاکمه کیم، ایله یه حکمونده خطا.
قیلا مظلوم لری مرحمتیندن محروم،
وئره ظالم لره اؤز نفعی ایچون استیلا.
رحمت اول حاکمه کیم، اولمایا ائلدن غافل،
نقد اوقاتی اولا بذل نیاز فقرا.
نیته کیم خطۀ بغدادی مشرف قیلمیش
مظهر مرحمت و عدل محمد پاشا.
اول سرافراز کی، یومن قدم محترمی
اولیا برجونه اولموش سبب دفع بلا.
نیتی خیر اولوب، اعمالی سلاح اولماق ایله
هیچ کس یوخ کیم، اونا ائیله‌مه یه خیر دعا.
بؤیله حاکم اثر رحمتی دیر یزدانین،
قانسی اقلیمه قدم باسسا وئرور ذوق و صفا.
وار امیدیم کیم، اونی قیلمایا شرمنده عمل،
اول زامان کیم، قورولور محکمۀ روز جزا.
وار امیدیم کی، بولا فیض اجابت حق دن،
هر دعا کیم، قیلا صدق ایله فضولی گدا.